წინანდალში მამაკაცმა ყოფილი ცოლი სანადირო თოფით მოკლა. შინაგან საქმეთა სამინისტროს ცნობით, კახეთის პოლიციის დეპარტამენტმა გამოძიება სისხლის სამართლის კოდექსის 108-ე მუხლით დაიწყო, რაც განზრახ მკვლელობას გულისხმობს და ისჯება თავისუფლების აღკვეთით, ვადით 7-დან 15 წლამდე.

უწყების ინფორმაციით, 9 დეკემბერს, საღამოს, 1984 წელს დაბადებულმა პირმა ურთიერთშელაპარაკების ნიადაგზე ყოფილი ცოლი თავის საცხოვრებელ სახლში სანადირო თოფიდან გასროლით, თავის არეში დაჭრა. დაზარალებული თელავის საავადმყოფოში გადაყვანამდე გარდაიცვალა.

ამის შემდეგ, ბრალდებულმა იმავე სანადირო თოფით თავის არეში ჭრილობის მიყენებით თვითმკვლელობა სცადა, თუმცა იგი თელავის რაიონულ საავადმყოფოში გადაიყვანეს, სადაც ბადრაგის მეთვალყურეობის ქვეშ გადაუდებელი ოპერაცია ჩაუტარდა.

მეუღლესთან კონფლიქტის გამო ბრალდებულს ყოფილ ცოლთან მიახლოება და სატელეფონო კავშირი აკრძალული ჰქონდა, რასაც ქმარი არ დაემორჩილა.

შეგახსენებთ, რომ საქართველოს სახალხო დამცველმა 25 ნოემბერს, ქალთა მიმართ ძალადობის წინააღმდეგ ბრძოლის საერთაშორისო დღესთან დაკავშირებით, განცხადება გაავრცელა, რომლის მიხედვითაც, ბოლო 10 თვის მონაცემებით, ოჯახური ძალადობის ნიადაგზე 13 ქალი მოკლეს.