ოპოზიცია მმართველ გუნდს კიევში დაკავებული გიორგი ცერცვაძის გამო აკრიტიკებს.
აფხაზეთის და აგვისტოს ომების მონაწილეს რუსეთში ექსტრადირება ემუქრება. რუსული მხარე საქართველოს მოქალაქეს 2003 წელს მომხდარ დანაშაულში სდებს ბრალს. თუმცა როგორც ირკვევა, ინტერპოლმა ცერცვაძეზე ძებნა მხოლოდ ერთი თვის წინ გამოაცხადა.
საპარლამენტო უმცირესობა რუსეთისთვის გადაცემის შემთხვევაში მოსალოდნელ საფრთხეებზე საუბრობს და დაკავებულს თავდებში უდგება. ოპონენტები ხელისუფლებას რუსულ საგამოძიებო უწყებებთან თანამშრომლობაში და ცერცვაძის შესახებ ინფორმაციის მიწოდებაში ადანაშაულებენ, რასაც შინაგან საქმეთა სამინისტრო და პროკურატურა კატეგორიულად უარყოფს.
შეფასებებს აკეთებს მმართველი პარტიაც, რომლის ერთ-ერთი წევრის განცხადებას მწვავე კრიტიკა მოჰყვა.