ორი ოქროს, ორი ვერცხლის მედალი და არაოფიციალურ გუნდურ ჩათვლაში პირველი ადგილი. ასეთი შედეგით დაასრულა საქართველოს ძიუდოისტთა ნაკრებმა დიუსელდორფის გრან პრის გათამაშება.
ჩემპიონები ვაჟა მარგველაშვილი და ბექა ღვინიაშვილი გახდნენ, ხოლო მეორე ადგილები, ამირან პაპინაშვილმა და ლაშა შავდათუაშვილმა დაიკავეს.
გუშინ, ტურნირის დასკვნით დღეს, ბრწყინვალედ იჭიდავა 21 წლის ღვინიაშვილმა, რომელმაც ფინალში რუსეთის წარმომადგენელი, ხუსენ ხალმურზაევი დაამარცხა.
ორთაბრძოლის დასრულებამდე რამდენიმე წამით ადრე, ბექამ შესანიშნავი მოძრაობით ვაზარიზე დააგდო მეტოქე და ილეთი შებოჭვით დაასრულა.
ქართველი ძიუდოისტები რამდენიმე დღე გერმანიაში გააგრძელებენ საწვრთნელ პროცესს და ბაქოს გრანდ სლემისთვის მოემზადებიან, რომელიც 10 მარტს დაიწყება.