3 აპრილიდან თბილისში დასუფთავების ინსპექტორები ივლიან.

სპეციალურ უნიფორმაში ჩაცმული 20 კაციანი ჯგუფი დარღვევებს მხრის კამერით და ფოტოაპარატით დააფიქსირებს.

2 კვირის მანძილზე, ინსპექტორები მხოლოდ სიტყვიერი გაფრთხილებით შემოიფარგლებიან, 20 აპრილიდან კი ჯარიმებსაც გამოწერენ.

2 კილოგრამამდე ნაგვის დაყრის შემთხვევაში მოქალაქე 80 ლარით, 2 კილოს ზევით კი 150 ლარით დაჯარიმდება.

ინსპექტირება 2015 წელს მიღებული ნარჩენების მართვის კოდექსის მიხედვით მოხდება. შესაბამისი უწყებები ქვეყნის მასშტაბით კონტროლს აქამდეც ახორციელებდნენ, თუმცა ეს პირველი შემთხვევაა, როცა ქუჩაში დაყრილ ნაგავს ქვეითი ინსპექტორები გააკონტროლებენ.

საწყის ეტაპზე მხოლოდ ცენტრალურ უბნებში, ტურისტულ და საზოგადოებრივი თავშეყრის ადგილებში გაკონტროლდება.