საქართველოს საგარეო საქმეთა სამინისტრო სირიის ავიაბაზაზე აშშ-ის სარაკეტო თავდასხმასთან დაკავშირებით განცხადებას ავრცელებს, სადაც აღნიშნულია, რომ აშშ-ის მიერ განხორციელებული საპასუხო ქმედება იყო დროული, ადეკვატური და გამოყენებული იყო პროპორციული ძალა.
როგორც საგარეო უწყების განცხადებაშია აღნიშნული, მნიშვნელოვანია, რომ გატარდა ყველა სახის გამაფრთხილებელი ზომა.
„საგარეო საქმეთა სამინისტრო შეშფოთებას გამოთქვამს სირიაში, ქალაქ ჰან შეიხუნში ქიმიური იარაღის გამოყენებასთან დაკავშირებით, რასაც მშვიდობიანი მოსახლეობის მსხვერპლი მოყვა.
ქიმიური იარაღის განთავსებით, სირია საერთაშორისო სამართლის ნორმებს არღვევს.
ამგვარი ქმედებების უპასუხოდ დატოვება არ შეიძლება. აღნიშნულიდან გამომდინარე, მიგვაჩნია, რომ აშშ-ს მიერ განხორციელებული საპასუხო ქმედება იყო დროული, ადეკვატური და გამოყენებული იქნა პროპორციული ძალა. მნიშვნელოვანია, რომ გატარდა ყველა სახის გამაფრთხილებელი ზომა.
ვიმედოვნებთ, რომ საერთაშორისო საზოგადოება გამოიჩენს სათანადო პრინციპულობასა და ერთიანობას სირიაში საბოლოო მშვიდობის დასამყარებლად“, - აღნიშნულია საგარეო საქმეთა სამინისტროს განცხადებაში.