ნიუ-იორკში, თაიმზ სქვერზე მაღალი სიჩქარით მიმავალი ავტომობილი ტროტუარზე შევარდა და ქვეითად მოსიარულეებს დაეჯახა.

შემთხვევის შედეგად, 18 წლის გოგონა დაიღუპა, 22-მა კი სხვადასხვა ხარისხის დაზიანება მიიღო. 4 მათგანის მდგომარეობა კრიტიკულად მძიმეა.

ავტომობილის მძღოლი სამართალდამცველებმა გაქცევის მცდელობის დროს ადგილზე დააკავეს. ის შეერთებული შტატების მოქალაქე, ყოფილი სამხედრო, ბრონქსში მცხოვრები 26 წლის რიჩარდ როჰასი აღმოჩნდა, რომლის თქმითაც, მას გაურკვეველი ,,ხმები ესმოდა”.

სამართალდამცველების განცხადებით, როჰასი ბოლო წლებში 2-ჯერ იყო დაკავებული არაფხიზელ მდგომარეობაში ავტომობილის მართვისთვის, თუმცა ,,ასოშიეთიდ პრესის” ინფორმაციით, ამჯერად ალკოჰოლური ტესტი უარყოფითი აღმოჩნდა, ნარკოტიკულ საშუალებებზე ჩატარებული ანალიზის პასუხები კი ჯერჯერობით უცნობია.