გაერო-ს უშიშროების საბჭომ ჩრდილოეთ კორეის წინააღმდეგ სანქციების გაფართოების ფარგლებში „შავ სიას“ კიდევ 14 პირი და კომპანია დაამატა, რასაც გაერო-ში ჩინეთის მუდმივი წარმომადგენლის მხრიდან ნეგატიური შეფასება მოჰყვა.
გარდა ამისა, მოსკოვი შეერთებული შტატებისგან ჩრდილოეთ კორეის წინააღმდეგ დაწესებული სანქციების გამო განმარტებას ითხოვს. „შავ სიაში“ რუსული კომპანიები და რუსეთის ერთი მოქალაქეც მოხვდა.
პირველ ივნისს გაერო-ს უშიშროების საბჭომ ჩრდილოეთ კორეის წინააღმდეგ შემოღებული სანქციები გააფართოვა, მოგვიანებით კი სიას კიდევ რამდენიმე პირი და კომპანია დაუმატა. რეზოლუცია ფხენიანის მიერ ახალი ბალისტიკური რაკეტის გამოცდის საპასუხოდ იქნა მიღებული. სანქციები გავრცელდება ასევე სამ რუსულ კომპანიაზე, რომელსაც ვაშინგტონი ფხენიანთან ფინანსურ კავშირში ადანაშაულებს. ეს კომპანიაა Ardis-Bearings და მისი ორი შვილობილი კორპორაცია. სანქციების ფარგლებში, შავ სიაში მოხვედრილ პირებსა და კომპანიებს შეერთებული შტატების ტერიტორიაზე შესვლა ეკრძალებათ, ხოლო საბანკო ანგარიშები გაეყინებათ.
ამერიკის შეერთებული შტატების მუდმივმა წარმომადგენელმა ნიკი ჰეილიმ განაცხადა, რომ ჩრდილოეთ კორეის მთავრობა მისი ქმედებებით ამტკიცებს, რომ დიპლომატიის გზით პრობლემების გადაჭრა მიუღებელია.