თბილისის საქალაქო სასამართლოში მსახიობ გიორგი გიორგანაშვილის, იგივე ბახალას, სასამართლო პროცესი აქციის ფონზე მიმდინარეობს.
როგორც აქციის მონაწილეები ამბობენ, ისინი ნარკოპოლიტიკას აპროტესტებენ და ხელისუფლებას უფრო ჰუმანური ნაბიჯების გადადგმისკენ მოუწოდებენ. მათი განმარტებით, გიორგანაშვილის საქმეში მხოლოდ ორი პოლიციელის ჩვენებაა, რაც მიუთითებს იმაზე, რომ საქმე „შეკერილია“.
„ჩვენ აქ შევიკრიბეთ, რათა მხარი დავუჭიროთ გიორგი გიორგანაშვილს. ამ საქმეშიც, სხვა საქმეების მსგავსად მხოლოდ პოლიციელების ჩვენებაა. ისეთი ტენდენციაა ქვეყანაში, რომ ამ დროს ბრალს ყველა აღიარებს. თუმცა, გიორგი არის ის ადამიანი, ვინც ბრალს არ აღიარებს და ბრძოლას ბოლომდე აპირებს. ვფიქრობთ, რომ ეს საქმეც, როგორც არაერთი სხვა საქმე, „შეკერილია“, ბახალას წამალი ჩაუდეს“, - განაცხადა ნიკა ხოჭოლავამ.
მსახიობ გიორგი გიორგანაშვილს გამოძიება განსაკუთრებით დიდი ოდენობით ნარკოტიკული საშუალების პირადი მოხმარების მიზნით შეძენა - შენახვას ედავება.