პრეზიდენტმა შესაძლოა თვითმმართველობის კოდექსში შესატანი ცვლილებების კანონპროექტს ვეტო დაადოს. ამ თხოვნით გიორგი მარგველაშვილს 10-მა არასამთავრობო ორგანიზაციამ მიმართა.
მათი აზრით, მუნიციპალიტეტების გაერთიანების პროცესში დაირღვა „ადგილობრივი თვითმმართველობის კოდექსის“ ის ნაწილი, რომლითაც დადგენილია შესაბამის მუნიციპალიტეტებში ადგილობრივ მოსახლეობასთან კონსულტაციების გამართვის სავალდებულო წესი.
თემაზე არასამთავრობოებს დღეს პრეზიდენტის მრჩეველი და პრეზიდენტის საპარლამენტო მდივანი შეხვდნენ. მათი თქმით, პრეზიდენტი გადაწყვეტილებას კონსულტაციების შემდეგ მიიღებს.
ადგილობრივი თვითმმართველობის კოდექსში ცვლილებების მიხედვით, თვითმმართველი ქალაქების რაოდენობა 12-დან 5-მდე მცირდება. 7 ქალაქის მუნიციპალიტეტი კი თემის მუნიციპალიტეტს უერთდება და 2014 წლამდე მდგომარეობას უბრუნდება.