ოკუპირებული ცხინვალიდან 300 მეტრში, ერგნეთის საჯარო სკოლაში ახალი სასწავლო წელი, ტრადიციულად, სახელმწიფო ჰიმნითა და დროშის აღმართვით დაიწყო.
მოსწავლეებმა გვირგვინით შეამკეს ომში დაღუპულ გმირთა მემორიალი. სკოლის მოსწავლეებსა და პედაგოგებს ახალი სასწავლო წლის დაწყება მიულოცეს და საჩუქრები გადასცეს მინისტრებმა - ქეთევან ციხელაშვილმა და ტარიელ ხეჩიკაშვილმა.
სპორტის სამინისტრომ სკოლას სპორტული მოედანი გაუკეთა და მოსწავლეებს სპორტული ინვენტარი გადასცა. გორის რაიონში, საოკუპაციო ხაზთან მდებარე სოფელ ბერშუეთის სკოლის მოსწავლეებსა და პედაგოგებს კი სასწავლო წლის დაწყება საქართველოს პრეზიდენტის ადმინისტრაციის უფროსმა და პრეზიდენტის მრჩევლებმა მიულოცეს.
გიორგი აბაშიშვილმა ბერშუეთის საჯარო სკოლის მოსწავლეებს მიმართა და განაცხადა, რომ განათლება მთავარი იარაღია, რომლის მეშვეობითაც ოკუპაციის დაძლევა შესაძლებელია.