სიღნაღში, ისტორიისა და ეთნოგრაფიის მუზეუმის დაარსებიდან 70, ხოლო საქართველოს ეროვნულ მუზეუმში გაერთიანების 10 წლის იუბილე აღინიშნა.
ამ დღესთან დაკავშირებით, გამოჩენილი მხატვრების, ელენე ახვლედიანის რეტროსპექტული გამოფენის და ნიკო ფიროსმანის ნამუშევრების განახლებული ექსპოზიციების პრეზენტაცია გაიმართა.
საქართველოს ეროვნული მუზეუმის გენერალური დირექტორის დავით ლორთქიფანიძის განცხადებით, სიღნაღის მუზეუმი დემოკრატიული საქართველოს პირობებში ერთ-ერთი პირველი მუზეუმია, რომელიც საერთაშორისო სტანდარტების შესაბამისადაა მოწყობილი და ის როგორც რეგიონის, ასევე ქვეყნის მასშტაბით კულტურულ-საგანმანათლებლო და ტურისტულ ცენტრს წარმოადგენს.
მუზეუმში ყოველწლიურად იზრდება სხვადასხვა ქვეყნიდან ჩამოსულ დამთვალიერებელთა რიცხვი და ბოლო ათი წლის განმავლობაში 200 000 გადააჭარბა.
ნიკო ფიროსმანისა და ელენე ახვლედიანის ნახატების გამოფენის ნახვა მუზეუმის სტუმრებისთვის თავისუფალია. გამოფენა გაზაფხულამდე გაგრძელდება.