საქართველოს თავდაცვის სამინისტროში უწყების განახლებული ვებგვერდის, საქართველოს სამხედრო ისტორიის გვერდის, ისტორული და სამხედრო-პოლიტიკური თემატიკის ფეისბუქ ტესტების პრეზენტაცია გაიმართა.
პრეზენტაციას მინისტრის მოადგილე ნუკრი გელაშვილი, უწყების დეპარტამენტებისა და გენერალური შტაბის ხელმძღვანელი პირები დაესწრნენ.
სტუმრებს პრეზენტაცია სტრატეგიული კომუნიკაციებისა და საზოგადოებასთან ურთიერთობის დეპარტამენტის წარმომადგენელმა იასონ ნაჭყებიამ წარუდგინა. ვებგვერდისთვის ახალი და მოქნილი დიზაინი შეიქმნა, რომელიც ადაპტირებულია ყველა ტიპის შესაბამისი მოწყობილობისთვის. შეიქმნა ახალი განყოფილებები სამინისტროსა და გენერალური შტაბის სტრუქტურული ერთეულების, სამხედრო განათლებისა და კარიერის, პროფესიული განვითარების პროგრამების, საქართველოს ეროვნული გმირების, ჰერალდიკის, უწყებრივი ჯილდოების და სხვა აქტუალური მიმართულებების შესახებ.
საქართველოს სამხედრო ისტორიის ახალშექმნილი გვერდზე https://history.mod.gov.ge/ ოთხი ძირითადი განყოფილებაა წარმოდგენილი: საქართველოს დემოკრატიული რესპუბლიკის შეიარაღებული ძალები, ქართული იარაღ-საჭურველი, საქართველოს ეროვნული გმირები და წიგნი „გმირი“. 2018 წლის განმავლობაში, გვერდის ფარგლებში, ახალი განყოფილებების განვითარება იგეგმება.
სამინისტროს ფეისბუქის გვერდის ტესტების აპლიკაცია ფეისბუქის მომხმარებლებს საშუალებას მისცემს საკუთარი ცოდნა ისტორიულ, სამხედრო და პოლიტიკურ საკითხებში შეამოწმონ.
აღნიშნულ პროექტზე თავდაცვის სამინისტროს სტრატეგიული კომუნიკაციებისა და საზოგადოებასთან ურთიერთობისა და საინფორმაციო ტექნოლოგიების დეპარტამენტის წარმომადგენლებმა იმუშავეს.