საქართველოს რეგიონული განვითარებისა და ინფრასტრუქტურის მინისტრი, ელგუჯა ხოკრიშვილი საქართველოში ოფიციალური ვიზიტით მყოფ ისრაელის დელეგაციას შეხვდა. აღნიშნულ დელაგაციას ისრაელის სოფლის მეურნეობისა და სოფლის განვითარების მინისტრი, იაირ შამირი ხელმძღვანელობს.
მხარეებმა ისაუბრეს ორ ქვეყანას შორის თანამშრომლობის პერსპექტივებსა და ურთიერთგამოცდილების გაზიარებაზე ადგილობრივი თვითმმართველობის, სოფლის განვითარებისა და ადგილზე მცხოვრები მოსახლეობის ეკონომიკური დონის ამაღლების მიმართულებებით.
„საქართველოსა და ისრაელს შორის თანამშრომლობის პრაქტიკა უკვე არსებობს, მაგრამ ვიმედოვნებ, რომ ჩემი ვიზიტის შემდეგ, ორ ქვეყანას შორის ურთიერთობა კიდევ უფრო გაღრმავდება და კარგი პარტნიორები გავხდებით. ეს ჩვენ დაგვეხმარება ტექნოლოგიებისა და გამოცდილების ურთიერთგაზიარებაში. მე, ჩემთან ერთად, ჩამოვიყვანე 13 მსხვილი ებრაული კომპანიის წარმომადგენელი, რომლებიც მზად არიან საქართველოში ბიზნესის საწარმოებლად", - განაცხადა იაირ შამირმა.
„ჩვენ ვისაუბრეთ ორ ქვეყანას შორის ურთიერთთანამშრომლობის პერსპექტივებზე, ასევე, სამინისტროებს შორის გამოცდილების გაზიარებაზე. გარდა ამისა, ასოცირების შეთანხმების ხელმოწერის შემდეგ, ჩვენ მჭიდროდ ვითანამშრომლებთ ისრაელთან სხვადასხვა მიმართულებებით", - აღნიშნა ელგუჯა ხოკრიშვილმა.
შეხვედრის დასასრულს, ისრაელის სოფლის მეურნეობისა და სოფლის განვითარების მინისტრმა, იაირ შამირმა საქართველოს რეგიონული განვითარებისა და ინფრასტრუქტურის მინისტრი, ელგუჯა ხოკრიშვილი ისრაელში ოფიციალური ვიზიტით დაპატიჟა.