მთავრობის 2 წლის საქმიანობის ანგარიში სამინისტროების პირველმა პირებმა დღეს შიდა ქართლის მოსახლეობას წარუდგინეს. რეგიონის საზოგადოების, არასამთავრობო ორგანიზაციებისა და მედიის წარმომადგენლებთან გამართულ შეხვედრაზე მთავრობის წევრების გარდა, თავისი 1 წლის საქმიანობის ანგარიში წარადგინა შიდა ქართლის მხარეში სახელმწიფო რწმუნებულ-გუბერნატორმა ზურაბ რუსიშვილმა.
რეგიონული განვითარებისა და ინფრასტრუქტურის მინისტრის მოადგილის გიორგი კობერიძის განცხადებით, შიდა ქართლის რეგიონში ბოლო წლის განმავლობაში 32 მილიონ ლარზე მეტი დაიხარჯა შემდეგ პროექტებზე: 6 მდინარის (მტკვარი, სურამულა, ბოჟამი, ძამა, თეძამი, ლეხურა) ნაპირსამაგრ სამუშაოებზე, სულ 4 023 360 ლარის ღირებულების; გზების მოასფალტებაზე, მოხრეშვა-მოშანდაკებაზე, ორმოულის შეკეთებაზე, სანიაღვრეების მოწყობაზე და ხიდების მშენებლობა-რეაბილიტაციაზე შიდა ქართლში დაიხარჯა 15 344 543 ლარი. საავტომობილო მაგისტრალის რუისი-აგარის სამშენებლო მონაკვეთის სიგრძე საერთო ჯამში 19 კილომეტრია. პროექტის ღირებულება 70 მილიონი ლარს შეადგენს, დონორი ორგანიზაცია მსოფლიო ბანკია. სამუშაოებზე 500-ზე მეტი ადამიანია დასაქმებული, მათგან 70% ადგილობრივი მცხოვრებია, რომელთა დიდი ნაწილი მიმდებარე სოფლების მოსახლეობაა.