საქართველოს რეგიონული განვითარებისა და ინფრასტრუქტურის სამინისტროს „მუნიციპალური განვითარების ფონდი“, „გაერთიანებული წყალმომარაგების კომპანიასთან“ ერთად, ქალაქ ოზურგეთში, მასშტაბურ ინფრასტრუქტურულ პროექტს ახორციელებს. მიმდინარე სამუშაოებს, დღეს, რეგიონული განვითარებისა და ინფრასტრუქტურის მინისტრის პირველი მოადგილე, გიორგი ამაშუკელი „გაერთიანებული წყალმომარაგების კომპანიის” წარმომადგენლებთან ერთად გაეცნო.
პროექტის ფარგლებში, 30 კილომეტრიან მონაკვეთზე გამოიცვლება ამორტიზებული მილები. ასევე, განხორციელდება სატუმბი სადგურიდან გამომავალი მილსადენისა და ქალაქის ცენტრალური უბნების წყალმომარაგების ქსელის რეაბილიტაცია.
ამჟამად არსებული ამორტიზებული წყალსადენი ქალაქის წყალმომარაგების ქსელის ხშირ დაზიანებებს იწვევს, რის გამოც იზრდება წყლის დანაკარგი, წნევა არასტაბილური ხდება და სასმელი წყლის მიწოდება ფერხდება. სამუშაოების დასრულების შემდეგ ოზურგეთის 10.300 მცხოვრები მაღალი ხარისხის წყალს გაუმჯობესებული გრაფიკით მიიღებს.
პროექტს საქართველოს რეგიონული განვითარებისა და ინფრასტრუქტურის სამინისტროს “მუნიციპალური განვითარების ფონდი” და “გაერთიანებული წყალმომარაგების კომპანია“ ევროპის საინვესტიციო ბანკის ფინანსური მხარდაჭერით ახორციელებს. სამუშაოებზე 22 ადამიანია დასაქმებული, რომელთა უმრავლესობა ადგილობრივი მკვიდრია.