საქართველოს რეგიონული განვითარებისა და ინფრასტრუქტურის სამინისტროს “მუნიციპალური განვითარების ფონდი”, “გაერთიანებული წყალმომარაგების კომპანიასთან“ ერთად ქალაქ ხობში წყალმომარაგების გაუმჯობესების მიზნით სარეაბილიტაციო სამუშაოებს ახორციელებს. მიმდინარე სამუშაოები დღეს რეგიონული განვითარებისა და ინფრასტრუქტურის მინისტრის პირველმა მოადგილემ გიორგი ამაშუკელმა და „გაერთიანებული წყალმომარაგების კომპანიის” დირექტორმა ვლადიმერ ლაზარიშვილმა დაათვალიერეს.
პროექტის ფარგლებში განახლდება წყალმომარაგების სისტემა, განხორციელდება სათავე ნაგებობისა და ჭაბურღილების სრული რეაბილიტაცია და გამოიცვლება ქალაქის ქსელის ამორტიზებული მილები. სამუშაოების დასრულების შემდეგ, ქალაქის 6500 მაცხოვრებელი 16 საათიანი გრაფიკის ნაცვლად, ხარისხიან წყალს 24 საათიან უწყვეტ რეჟიმში მიიღებს.
ქალაქ ხობის წყალსადენის ქსელის ძირითადი ნაწილი დღეისათვის ამორტიზებულია, რეაბილიტაციას საჭიროებს სატუმბი სადგურიც. დაბალი წნევის გამო, გართულებულია მრავალბინიან საცხოვრებელ კორპუსებში მაღალ სართულებზე წყლის მიწოდება. აღნიშნული პროექტის განხორციელების შედეგად ეს პრობლემაც გადაიჭრება.
საქართველოს “მუნიციპალური განვითარების ფონდი” და “გაერთიანებული წყალმომარაგების კომპანია“ წყალომომარაგების სისტემის რეაბილიტაციას, ევროპის საინვესტიციო ბანკის ფინანსური მხარდაჭერით ახორციელებს. პროექტის დასრულება მიმდინარე წლის ოქტომბერშია დაგეგმილი. სამუშაოებზე 22 ადამიანია დასაქმებული, რომელთა უმეტესობა ადგილობრივი მოსახლეა.