საქართველოს პრეზიდენტის ადმინისტრაციაში გამართულ ეროვნული უშიშროების საბჭოს სხდომაზე ერთ-ერთ საკითხად თავდაცვის სამინისტროში განხორციელებული რეფორმები განიხილეს. სხდომის მუდმივმოქმედ წევრებს თავდაცვის უწყებაში ოპტიმიზაციისა და ტრანსფორმაციის პროცესში ჩატარებულ რეფორმებზე ინფორმაცია მთავარმა მომხსენებელმა, საქართველოს თავდაცვის მინისტრმა ლევან იზორიამ და თანამომხსენებელმა, გენერალური შტაბის უფროსმა, ბრიგადის გენერალმა ვლადიმერ ჩაჩიბაიამ მიაწოდეს.
სხდომის დღის წესრიგში სხვა საკითხებს შორის, შავი ზღვის რეგიონში არსებული უსაფრთხოების გარემო და შავი ზღვის უსაფრთხოების დიალოგში საქართველოს მონაწილეობაც იყო, სადაც თანამომხსენებლებად თავდაცვის მინისტრი და გენერალური შტაბის უფროსი გამოვიდნენ.
ლევან იზორია თანამომხსენებლის რანგში კიდევ ერთ საკითხთან დაკავშირებით წარსდგა და საგარეო საქმეთა მინისტრის მოადგილესთან, დავით დონდუასთან ერთად, საქართველო-ნატოს პარტნიორობის თემაზე ისაუბრა. მინისტრმა პარტნიორობის ფარგლებში, თავდაცვის სფეროში საქართველოს მხრიდან შესრულებულ ვალდებულებზე ისაუბრა და ყურადღება ნატო-საქართველოს არსებითი პაკეტით (SNGP) გათვალისწინებულ გადადგმულ ნაბიჯებზე გაამახვილა.
ეროვნული უშიშროების საბჭო საქართველოს პრეზიდენტის სათათბირო ორგანოა,
რომელიც იქმნება საქართველოს კონსტიტუციის 99-ე მუხლის თანახმად, სამხედრო აღმშენებლობისა და თავდაცვის ორგანიზაციის, ქვეყნის უშიშროებასთან დაკავშირებული საშინაო და საგარეო პოლიტიკის, სტაბილურობისა და მართლწესრიგის უზრუნველყოფის სტრატეგიულ საკითხებზე გადაწყვეტილებების მისაღებად.