"დიდო მოსკოვო, დილა მშვიდობისა! TGZ 930. პატარა ქართველი ძირს ეშვება და მოგესალმებათ თქვენ, საყვარელო მოსკოვო", — ცდებით, თუ გგონიათ, რომ ეს სიტყვები ბუბა კიკაბიძემ თქვა მიმინოს გადაღებისას. ასე ესაუბრება Georgian Airways-ის მფრინავი რუს ავიამეთვალყურეებს მოსკოვში დაშვებისას 2018 წელს.ცალმხრივი სიყვარული
On.ge-ს მკითხველმა მიაწოდა აუდიომასალა, რომელშიც საქართველოს ავიახაზების (ყოფილი აირზენა) მფრინავისა და მოსკოვის საჰაერო მოძრაობის მომსახურების ორგანოს შორის რუსულენოვანი საუბარია ჩაწერილი.

ქართული ავიახაზების მფრინავისა და რუსი ავიამეთვალყურის საუბარი "საყვარელი მოსკოვის" გულითადი მოკითხვით იწყება. მფრინავი, რომელიც დილა მშვიდობისას უსურვებს რუს ავიამეთვალყურეებს, პასუხად იღებს მხოლოდ მონაცემებსა და ინსტრუქციას თვითმფრინავის დასმის შესახებ. თუმცა, ის ემოციური ტონით მიმართვას აგრძელებს და სხვა პირობებით დაშვებას ითხოვს, რის პასუხადაც ეუბნებიან, რომ დაშვება შეუძლია, მთავარია, დროულად მოასწროს.

ქართველები თქვენი დახმარებით და მხარდაჭერით ყოველთვის ყველაფერს მოასწრებენ. თუ სომეხიც დაგვემატება, ჩვენ 100%-ით რაიხსტაგთანაც მივალთ

Georgian Airways-ის მფრინავი

მფრინავის ამ ნოსტალგიური ფრაზის პასუხად რუსი ავიამეთვალყურეების სიცილი ისმის. მასთან კონტაქტზე მყოფი პირისგან კი მფრინავი პასუხად იღებს: "გასაგებია".

მკითხველის მიერ მოწოდებულ აუდიოჩანაწერში ისმის ამ მფრინავის კიდევ ერთი საუბარი, ამჯერად სხვა ავიამეთვალყურესთან. საუბარი "პატარა ქართველის" მიერ "დიდი რუსისთვის" თვითმფრინავის დასმის პირობების შეთანხმებით იწყება.

რუსი ავიამეთვალყურე ამჯერადაც მშრალი პასუხით შემოიფარგლა და პილოტს არა "პატარა ქართველით", არამედ "თამაზ 930"-ით მიმართავს, რაც Georgian Airways-ის ოფიციალური მოსახმობი სიტყვაა. მფრინავი ამას რეპლიკით პასუხობს: "აი, ეს არის ჭეშმარიტი რუსის ხმა".

მონაცემების შეთანხმების შემდეგ რუსი ავიამეთვალყურე თვითმფრინავს დაჯდომის უფლებას აძლევს, პასუხად კი მფრინავისგან ისმენს: "მეც ყოველთვის ამას ვამბობ, რუსეთმა ყველაფერი იცის".