2013 წლის 14 ნოემბერს, თბილისისა და მცხეთა-მთიანეთის პრობაციის ბიუროებში აღრიცხვაზე მყოფმა პირობით მსჯავრდებულებმა სოფელ წიწამურის მახლობლად, ილია ჭავჭავაძის ობელისკთან დაგეგმილი სარეაბილიტაციო პროექტისთვის მოსამზადებელი სამუშაოები ჩაატარეს.
30-მა პრობაციონერმა, სხვადასხვა უწყებებისა და ორგანიზაციების წარმომადგენლებთან ერთად,ობელისკის კვარცხლბეკის მიმდებარე ტერიტორიიდან ნარჩენები გაიტანეს და ტერიტორია მოაწესრიგეს.
აქციაში ასევე მონაწილეობდა სასჯელაღსრულების, პრობაციის და იურიდიული დახმარების საკითხთა მინისტრის პირველი მოადგილე გრიგოლ გიორგაძე.
აღნიშნული ღონისძიება 8 ნოემბერს ილიას ობელისკთან გამართულ შეხვედრაზე დაიგეგმა, რომელსაც, კულტურისა და ძეგლთა დაცვის მინისტრის გურამ ოდიშარიას მიწვევით, ესწრებოდნენ სასჯელაღსრულების, პრობაციისა და იურიდიული დახმარების საკითხთა მინისტრი სოზარ სუბარი და მინისტრის პირველი მოადგილე გრიგოლ გიორგაძე. შეხვედრაზე სოზარ სუბარი გამოვიდა ინიციატივით ილია ჭავჭავაძის ძეგლის რეაბილიტაციის პროცესში პრობაციონერების აქტიურად ჩართვის თაობაზე.