იმისათვის, რომ თქვენმა ვიდეომ შემოსავალი დააგროვოს, აუცილებელია შესრულდეს ორი პირობა:

1. 1. სხვა მომხმარებელმა ნახოს თქვენი ვიდეო
2. 2. ვიდეოს ნახვისას ჩაიტვირთოს რეკლამა.

(ვიდეოს დასაწყისში, ბანერი ვიდეოს გვერდზე, ან ორივე)

იქიდან გამომდინარე, რომ ჩვენი სარეკლამო სივრცე სხვადასხვა პერიოდში სხვადასხვა ინტენსიობითაა დატვირთული, გარდა ამისა, წინასწარ ვერ დათვლით კონკრეტული ნახვების რაოდენობაზე რამდენჯერ გავა რეკლამა და რა ხანგრძლივობის იქნება ის, შესაბამისად ვერ გაიგებთ მის ღირებულებას და ვერ გამოთვლით თანხას. შემოსავლის წინასწარ განსაზღვრისთვის შეგიძლიათ იხელმძღვანელოთ შემდეგი მაჩვენებლით: პარტნიორის ვიდეორგოლის რეკლამით 100%იანი დატვირთვის შემთხვევაში, მის მიერ დაგროვილი თანხა ყოველ 1000 ნახვაზე შეადგენს 3 ლარს.

იმისათვის, რომ მოახდინოთ პოტენციური შემოსავლის მაქსიმიზაცია, უნდა ეცადოთ, რომ ის რაც შეიძლება მეტმა სხვადასხვა ადამიანმა ნახოს, შესაბამისად შეგიძლიათ გააზიაროთ ის სოციალურ ქსელებში და ა.შ, რაც გაზრდის ნახვების რაოდენობას და შესაბამისად იმის შანსს, რომ მასზე გავიდეს რეკლამა.

თქვენი შემოსავლების კონტროლი ნებისმიერ დროს შეგიძლიათ სტატისტიკით, რომელიც ხელმსიაწვდომია პარტნიორის გვერდზე ავტორიზაციის შემდეგ, და ასახავს რეკლამების ჩვენების სტატისტიკასა და დაგროვილ თანხას თქვენთვის სასურველი დროის პერიოდში.

პარტნიორის სტატუსის მქონე ავტორს მის გვერდზე გასული რეკლამის ჩვენებათა რაოდენობის შესაბამისად დაერიცხება გამომუშავებული თანხა. მიმდინარე თვის თანხის დარიცხვა ხდება მომხმარებლის საბანკო ანგარიშზე მომდევნო თვის 15 რიცხვში და განაღდება შესაძლებელია თვეში ერთხელ საბანკო გადარიცხვით, იმ შემთხვევაში, თუკი დაგროვილი თანხა აღემატება 50 ლარს. კერძო პირებს დაუკავდებათ კანონით დადგენილი საშემოსავლო გადასახადი.

გამომუშავებული თანხის სტატისტიკის ხილვა შესაძლებელია მომხმარებლის ანგარიშში ავტორიზაციის გავლის შემდეგ. myvideo.ge-ს ადმინისტრაცია არ იძლევა გარანტიას, რომ სარეკლამო განყოფილება პარტნიორის ვიდეომასალას რეკლამით დატვირთავს 100%-ით.

ნებისმიერი კითხვის შემთხვევაში მოგვწერეთ, ჩვენი გუნდი ყოველთვის მზადაა დაგეხმაროთ!

myvideo.ge გიქმნით პირობებს, რომ თქვენ შექმნათ, გაავრცელოთ და გააზიაროთ თქვენთვის სასურველი ვიდეომასალა და მიიღოთ შემოსავალი. ქვემოთ მოცემული ინფორმაცია განკუთვნილია პარტნიორის სტატუსის მქონე, ან მსურველი მომხმარებლებისათვის, და შეიცავს რჩევებს ისეთი საკითხების შესახებ, როგორებიცაა

• როგორ უნდა დააინტერესოთ (ახალი) მაყურებელი;
• როგორ უნდა დარჩეთ შთაგონებული, რომ შეინარჩუნოთ ვიდეო სერიების მაღალი ხარისხი;
• როგორ უნდა შესთავაზოთ მაყურებელს მისთვის სასიამოვნო ვიდეო კონტენტი.

პირველი ნაბიჯი წარმატებისკენ არის ის, რომ თქვენ სწორად შეარჩიოთ თქვენი არხის თემატიკა. ყველაფერი ბევრად მარტივია მაშინ, როდესაც თქვენ ქმნით კონტენტს იმ თემაზე, რომელიც გიყვართ ან გაინტერესებთ. ასევე გაითვალისწინეთ თქვენი მაყურებლების აზრი - როგორ გსურთ რომ მათ დაამახსოვრდეთ? რატომ უნდა გიყურონ და გამოიწერონ თქვენი არხი?

გამომწერები კრიტიკული ელემეტია თქვენი არხის წარმატებისთვის. ეს არის ადამიანების ჯგუფი, რომლებიც აუცილებლად ნახავენ ყოველ თქვენს შემდეგ ვიდეოს, ისინი თქვენი რესურსია, რომლებიც არ დაიშურებენ თქვენთვის დადებით გამოხმაურებებს, ისევე როგორც გულწრფელ კრიტიკას.

პირველ ეტაპზე აუცილებელია დასახოთ რამოდენიმე მიზანი თქვენი არხისთვის. გადაწყვიტეთ რა მიმართულებით გინდათ წახვიდეთ, შეარჩიეთ თემა რაზეც ფოკუსირდებით და წარმოიდგინეთ შესაძლო წარმატება, რასაც შეიძლება მიაღწიოთ. თუკი გადაწყვეტთ, რომ თქვენი არხი თქვენი შემოსავლის რეგულარული წყარო გახდეს, სხვანაირად უნდა დაგეგმოთ ვიდეოების გადაღება-ატვირთვის პროცესი, მაშინ როდესაც არხს, რომელიც მხოლოდ თქვენი მეგობრების გასამხიარულებლადაა შექმნილი, სულ სხვა მიდგომა სჭირდება.

იმისათვის, რომ ეს პროცესი გაგიადვილდეთ, გადახედეთ თქვენს საყვარელ არხებს, მოიფიქრეთ, რა მოგწონთ მათში ყველაზე მეტად და რას შეცვლიდით, ჩამოწერეთ ის ელემენტები, რაც მათთან საერთო გინდათ რომ გქონდეთ.

ამ ეტაპის მნიშვნელოვანი ნაწილია რომ გაიაზროთ ვინ იქნება თქვენი აუდიტორია. ეს აუცილებელი პირობაა იმისათვის, რომ ჩამოყალიბდეთ, იოგას ინსტრუქციები გადაიღოთ, თუ რჩევები დიასახლისებისათვის. გადახედეთ ჩვენი პოპულარული არხების სტატისტიკას, აარჩიეთ რამოდენიმე არხი სხვადასხვა კრიტერიუმით- ნახვების რაოდენობით, გამომწერების რაოდენობით ან ვიდეოების თემატიკის მიხედვით და ასე უფრო გაგიადვილდებათ თქვენი მომავალი არხის თემატიკის არჩევა.

გზა წარმატებისკენ - 10 წესი!

წესი 1: "გაზიარებადობა"

გააზიარებს თუ არა მაყურებელი თქვენს ვიდეოს?

რაც უფრო მეტი ადამიანი განათავსებს ვიდეოს საკუთარ კედელზე, მით მეტი ხმაური მოჰყვება მას. ვიდეოს გაზიარება - არ გაზიარებას განაპირობებს ის ფაქტორი, თუ რა შინაარსის ვიდეოსთან სურთ გამზიარებლებს ასოცირება. მაგალითად, თუ ვიდეოს შინაარსი იუმორისტულია - მის გამზიარებელს სურს თავისი მხიარული მხარის წარმოჩენა. ,,ჭკვიანური’’ ვიდეოს გამზიარებლს - ინტელექტის დემონსტრირება და ასე შემდეგ. ამიტომ, სანამ გადაწყვეტთ თუ რა თემაზე შექმნათ ვიდეო, დაფიქრდით შემდეგ საკითხებზე:

1. 1. რა არის თქვენი ძლიერი მხარე და როგორ შეიძლება მაყურებლისთვის მისი სწორად მიწოდება ვიდეოს მეშვეობით;
2. 2. რა შთაბეჭდილება დარჩება მესამე პირს თქვენს ვიდეოსა და მის გამზიარებელზე;
3. 3. რა გააზიარეთ ბოლოს თქვენ და რამ გიბიძგათ მისი გაზიარებისკენ;

როგორ უნდა მოიპოვოთ მეტი გაზიარება?

1. 1. იყავით აქტუალურნი - აირჩიეთ მოთხოვნადი თემა და შესთავაზეთ თქვენეული ხედვა მაყურებელს, ასე შეიძენთ ერთგულ მაყურებელს.
2. 2. იყავით პრაქტიკულნი: რაც უფრო გამოყენებადია ვიდეო, მით მეტად ფასობს ის. თუ თვლით, რომ ღირებულ ცოდნას, ინფორმაციას ან გამოცდილებას ფლობთ, გაუზიარეთ სხვებსაც სასარგებლო რჩევები.
3. 3. იყავით გამორჩეულნი: შესთავაზეთ თქვენს მაყურებელს რაიმე ნიშნით განსხვავებული ვიდეოები. მაგალითად, შეარჩიეთ რომელიმე ერთი ფერი და გახადეთ ის თქვენი ,,სახე’’ ან დაამახსოვრეთ მაყურებელს თავი განსხვავებული ვიზუალით, ხმის ტემბრით, ჩაცმის სტილით... ვიდეოს შინარსის გარდა, კიდევ უნდა იყოს რაიმე დამატებითი ფაქტორი, რაც მაყურებელს თქვენიანს გახდის.

წესი 2: კონტაქტი

გაქვთ თუ არა პირდაპირი საუბარი მაყურებელთან?

თუ ვიდეო სერიების შექმნას გეგმავთ, გაითვალისწინეთ მაყურებლის აზრი. თქვენი ვიდეო უნდა იყოს როგორც თქვენსა და მაყურებელს შორის არსებული დილოგი. (!!!) მაგრამ, არ აყვეთ უაზრო, ნეგატიურ და არაჯანსაღ კრიტიკას. ნუ შეიმჩნევთ უცენზურო და შეურაცხმყოფელი შინაარსის მქონე კომენტარებს. ეს არის სოციალური ქსელების სენი, რაც არ უნდა იქცეს თქვენი წარმატების ხელშემშლელ ფაქტორად.

როგორ ჯობს მაყურებელთან საუბრი?

1. 1. ესაუბრეთ თვენს აუდიტორიას ძირითად ვიდეოებში: აუცილებელობა არ მოითხოვს, რომ ყველა ვიდეოსერიაში მაყურებელს მიმართავდეთ. შეგიძლიათ თემატურად დაახარისხოთ და თავად აირჩიოთ მიმართვის ჟანრი და ფორმა (იუმორი, რიტორიკა...). ,,ოქროს შუალედს’’ თავად იპოვნით.
2. 2. გადაწყვიტეთ გსურთ თუ არა, ვიდეო ბლოგერობა: თუ არ გსურთ ვიდეო ბლოგერობა, გირჩევდით ძირითადი თემის დემონსტრირების გარდა, დამატებითი ვიდეორგოლების ჩაწერასაც, სადაც უშუალოდ მაყურებელს მიმართავთ.
3. 3. შეინარჩუნეთ ნამდვილი სახე: მაყურებელი თქვენგან არ მოითხოვს მსახიობობას. რაც უფრო ბუნებრივი იქნება თქვენი გამომეტყველება, ემოციები და საუბრის მანერა, მით მეტი გულშემატკივარი გეყოლებათ.

წესი 3: ინტერაქტიულობა

უნდა გახდეთ ინტერაქტიულნი!

მაყურებელის ჩართულობა პირველ რიგში თქვენთვის არის მომგებიანი. ინტერაქტიულობა შეგიძლიათ აღიქვათ მაყურებელთან კონტაქტის დამხმარე ან შემცვლელ ვარიანტად.

როგორ უნდა იყოთ ინტერაქტიულნი?

1. 1. დასვით კითხვები: თქვენს ვიდეოში სთხოვეთ მაყურებელს დააფიქსირონ კომენტარებში საკუთარი აზრი. მომდევნო ვიდეო რგოლში კი, უპასუხეთ მათ.
2. 2. გაეცანით მომხმარებლის აზრს: სთხოვეთ თქვენს აუდიტორიას მოგაწოდოთ იდეები შემდეგი ვიდეო სერიების გასავითარებლად.
3. 3. გააკეთეთ მაყურებელთა ვიდეოების ჩანართები: მაყურებლის ნებართვის თანახმად, გამოიყენეთ მათი ჩანაწერები ან ჩანაწერების ფრაგმენტები თქვენს ვიდეოსერიებში.

წესი 4: სტაბილურობა

რაში გამოიხატება თქვენი სტაბილურობა ?

თუ გსურთ, შეიძინოთ ერთგული აუდიტორია, დაიცავით თანმიმდევრულობა. ლოგიკური ჯაჭვის არსებობა სერიებში, სტაბილურობის შეგრძნებას შეუქმნის მაყურებელს.

1. 1. იდეა: ისეთი თემა აირჩიეთ ვიდეო სერიებისთვის, რომლის გაშლაც არ გაგიჭირდებათ.
2. 2. ფორმატი: აირჩიეთ ერთი ფორმატი. დროდადრო შესთავაზეთ სიახლეები გულშემატკივრებს.
3. 3. გრაფიკი: იქონიეთ მკაცრი განრიგი სერიების ჩაწერა - გაშვებისათვის. ეს დაგეხმარებათ ტონუსის შენარჩუნებაში და მაყურებელიც მომდევნო სერიას მითითებულ დროს დაელოდება.
4. 4. პერსონაჟი: შეინარჩუნეთ ძირითადი, სახასიათო პერსონაჟი - მაგალითად, იყოლიეთ ერთი მთხრობელი. მაყურებელი გააიგივებს მის ხმას თქვენს ვიდეო სერიებთან და ეს თქვენს პოპულარობაზე დადებითად აისახება.

წესი 5: მიზნობრივი სეგმენტი

რამდენად სწორად უმნიზნებთ თქვენს აუდიტორიას?

რაც უფრო აშკარა იქნება თუ ვისთვის ჰქმნით ვიდეო სერიებს, მით უფრო კარგად მოახერხებთ კონკრეტული სეგმენტის შესწავლას და ათვისებას. განურჩევლად იმისა, თქვენი მიზნობრივი სეგმენტი დიდ აუდიტორიას მოიაზრებს, თუ პატარას.

როგორ უნდა განსაზღვროთ მიზნობრივი სეგმენტი?

1. 1. ვიდეო სერიების თემა: თემატიკიდან გამომდინარე, შესაძლოა იმის განსაზღვრა, თუ ვინ არის თქვენი პოტენციური მაყურებელი. მაგალითად, ცხოველთა სამყაროზე თუ გეგმავთ ვიდეოების შექმნას, ესეიგი, თქვენი აუდიტორია ნებისმიერი ასაკისა და სქესის ცხოველთა მოყვარულნი შეიძლება იყვნენ.
2. 2. კონკრეტული ვიდოს თემა: ერთი თემა შეიძლება მრავალმხრივ გაიშალოს სხვადასხვა სერიაში. მაგალითად, ცხოველთა სამყაროს თემა, შეიძლება სერიების მიხედვით დაიყოს და ერთი სერია ერთ კონკრეტულ ცხოველს მიეძღვნას, მეორე - მეორეს და ასე შემდეგ. შესაბამისად, ამ დროს ცხოველთა მოყვარულები კიდევ ერთხელ გაივლიან მიზნობრივ დაყოფას, მინი-სეგმენტებად, ანუ კონკრეტული ცხოველის მოყვარულებად.
3. 3. არხის თემატიკა: თქვენი გვერდის შექმნისა და ვიდეოების ატვირთვის შემდეგ, შეგეძლებათ სერიების დახარისხება თემების მიხედვით, რაც მაყურებლისთვის სასურველი ვიდეოს ძიებას გაამარტივებს.

წესი 6: მდგრადი განვითარება

რატომ უნდა დაგეგმოთ განვითარების საფეხურები?

გრძელვადიანი წარმატების მოსაპოვებლად, საჭიროა წინასწარ გათვალოთ, თუ რამდენად არის შესაძლებელი არჩეული თემის განვითარება. მაყურებელს არ უნდა შეექმნას შთაბეჭდილება, რომ სერიები ზედმეტად გაშლილია. ამ დროს მათი ინტერესი კლებულობს და ეს ცუდად აისახება როგორც შოუს, ისე მისი ავტორის რეპუტაციაზე.

როგორ უნდა განავითაროთ ის, რაც აუდიტორიას მოსწონს?

1. 1. შეინარჩუნეთ სიმსუბუქე: მუშაობის პროცესში შეძენილი გამოცდილება მალე გაჩვენებთ, თუ როგორ ჯობს რესურსების გამოყენება-გადანაწილება.
2. 2. გააკეთეთ რეალური შეფასებები: შეადგინეთ ბიზნეს გეგმა. სწორად შექმნილი ბიზნეს გეგმა დიდ საქმეს გაგიწევთ მომავალში. ის დაგეხმარებათ, იყოთ კონცენტრირებულნი და სწორად განაგოთ რესურსები.
3. 3. რეზერვში იქონიეთ რამოდენიმე ჩანაწერი: წინასწარ შექმნილი ვიდეოსერიები დაგეხმარებათ, არ ჩამორჩეთ გრაფიკს, დროულად მიაწოდოთ სერიები თქვენს მაყურებელს და თავი დაიზღვიოთ გაუთვალისწინებელი რისკის შექმნის შემთხვევაში.

წესი 7: "აღმოჩენადობა"

რამდენად მარტივია თქვენი ვიდეოს ,,აღმოჩენა“?

myvideo.ge-ის ვიდეო არქივი ძალიან მდიდარია, როგორც რიცხვობრივად, ისე ჟანრობრივად. ჩვენი მომხმარებელი ყოველდღიურად იძიებს მისთვის საინტერესო მასალას. ხშირად, მათი ინტერესის სფერო ტრენდული და ,,ცხელი’’ თემები ხდება. თუმცა, myvideo.ge-ის მომხმარებლი, არანაკლებ დაინტერესებულია ისეთი ინფორმაციის მიღებით, რომელიც მუდმივ სარგებელს წარმოადგენს საზოგადოებისთვის. გაითვალისწინეთ, თქვენი ვიდეოს ,,აღმოჩენადობა’’ დამოკიდებულია თქვენ მიერ არჩეული თემის აქტუალურობაზე ან/და სარგებელზე.

როგორ უნდა გახადოთ ვიდეო მარტივად ,,აღმოჩენადი’’?

1. 1. ააგეთ თქვენი შოუ ტრენდული ვიდეოებით: ადევნეთ თვალი საქართველოსა და მსოფლიოში მომხდარ მოვლენებს და იყავით აქტუალური თემების მიმწოდებელნი. მოთხოვნადი თემა საძიებო სიის ტოპ პოზიციებს ადვილად დაიკავებს. ასეთ თემათა ნუსხაშია, მაგალითად, ოლიმპიადა, არჩევნები, სხვადასხვა ღონისძიებები და ზოგადად აქტუალური ამბები.
2. 2. შექმენით ,,მარად მწვანე’’ ვიდეო კონტენტი: გაუზიარეთ მაყურებელს თქვენი ცოდნა და გამოცდილება. ამ ტიპის ვიდეოების უპირატესობაა ის, რომ სრულიად თქვენზეა დამოკიდებული ვიდეო სერიების წარმატება. მუდამ პოპულარულ, ,,მარად მწვანე’’ თემათა შორისაა, მაგალითად, ,,დიასახლისის რჩევები’’, ,,მინი რემონტი - საოჯახო გაკვეთილები’’ ,,გეომეტრიის ამოცანა-ამოხსნები’’, ,,მართვის მოწმობის ონლაინ გაკვეთილები’’ და ასე შემდეგ.
3. 3. ყურადღებით შეარჩიეთ სათაურები: შესაძლოა, ძალიან საინტერესო ვიდეო შეუმჩნეველი დარჩეს არასწორად შერჩეული სათაურის გამო.

წესი 8: სიმარტივე

რამდენად მარტივი გასაგები იქნება თქვენი ვიდეოები ახლად შეძენილი მაყურებელისათვის?

აუცილებლად უნდა გაითვალისწინოთ ახალი მაყურებელი მუშაობის პროცესში. თუ თქვენ ვიდეო არქივი 20 ეპიზოდისგან შედგება და ახალი მნახველი გამოუჩნდა რიგით მე-19-ეს, სავალდებულო არ უნდა გახდეს წინა 18 ეპიზოდის ყურება, მე-19-ეს აზრის გასაგებად. გახსოვდეთ, დამოუკიდებელი ვიდეო-ეპიზოდები, მარტივი გზაა ამ პრობლემის თავიდან ასაცილებლად.

როგორ უნდა შექმნათ მარტივად გასაგები ვიდეო კონტენტი?

1. 1. დაყავით ვიდეოები ნაწილებად: თუ შერჩეული თემა იმდენად საინტერესოა, რომ ერთი ვიდეოს რეგლამენტი (რომელიც თავად უნდა შეიმუშაოთ) მას არ იტევს, შეგიძლიათ, ეს თემა დაყოთ და რამდენიმე სერიად გადაიღოთ. ამ შემთხვევაში, სასურველია, ყველა ნაწილს ჰქონდეს ერთი სათაური და ნუმერაცია.
2. 2. გააკეთეთ შესავალი: თუ თქვენი ახალი ვიდეო, ძველი თემების ელემენტებს შეიცავს, მაყურებელს შეახსენეთ წინა სერიების საკვანძო მომენტები მანამ, სანამ ახალი ვიდეოს სიუჯეტს შესთავაზებდეთ.
3. 3. მიეცით მაყურებელს ინსტრუქცია: თუ თქვენი ძველი სერია უდევს ახალს საფუძვლად, უბრალოდ წინასწარ გააფრთხილეთ მაყურებელი ამის შესახებ და ურჩიეთ კონკრეტულად რომელი სერიის ნახვა იქნებოდა უმჯობესი, არსებულ თემაზე სრული ინფორმაციის მისაღებად.

წესი 9: თანამშრომლობა

რა არის ,,ძალების’’ გაერთიანების მთავარი მოტივი?

პოპულარობისა და ხანგრძლივი წარმატებისათვის ძალიან სასარგებლოა მეგობარი ვიდეო-ბლოგერების შეძენა.

რა გზით არის თანამშრომლობა შესაძლებელი?

1. 1. მოიწვიეთ სტუმრები შოუში: ააგეთ თქვენი ვიდეო სერიები ისე, რომ სტუმრების მოწვევა ორგანულად ჯდებოდეს შოუს ფორმატში.
2. 2. დაუმეგობრდით კონკურენტებს: იმისთვის, რომ თანამშრომლობა ორივე მხარისთვის თანაბრად მომგებიანი იყოს, უმჯობესია მეგობრად თქვენი მთავარი კონკურენტი აირჩიოთ. თუ როგორი სახე უნდა ქონდეს თქვენს პარტნიორობას, ეს უშუალოდ თქვენი და თქვენი პარტნიორის სურვილებიდან გამომდინარე გახდება ნათელი.
3. 3. პოზიტიურად დაამახოვრეთ თავი პარტნიორებს: სასიამოვნო გამოცდილება თქვენს საქმიან ურთიერთობას პარტნიორთან უფრო გაამყარებს, რაც სამომავლოდ გამოგადგებათ.

წესი 10: შთაგონება

რა არის თქვენი შთაგონების წყარო?

საზოგადოდ აღიარებული ფრაზა, ,,აკეთეთ ის, რისი კეთებაც გიყვართ’’, ამ შემთხვევაშიც გასათვალისწინებელია. როდესაც რამეს კარგად და სიამოვნებით აკეთებთ, ეს არ დარჩება მაყურებლისგან შეუმჩნეველი. ხარისხი ყოველთვის ფასობს.

როგორ უნდა დარჩეთ შთაგონებულნი?

1. 1. რა მოგწონთ თქვნ: მარტივია აუდიტორიას მოაწონოთ ის, რაც თავად თქვენთვის არის მოსაწონი, ვიდრე ის, რაც თქვენ არ გხიბლავთ.
2. 2. რისი დეფიციტია ვიდეო პორტალზე: თუ თქვენ შეძლებთ ნიშის აღმოჩენას და მის შევსებას, აუცილებლად შეიძენთ ერთგულ მაყურებელს.
3. 3. მოერიდეთ პოპულარობის მოხვეჭის მიზნით ვიდეოების ჩაწერას: არ დაგავიწყდეთ ფრაზა, ,,აკეთეთ ის, რისი კეთებაც გიყვართ’’. ეს გაგიმარტივებთ სამუშაო პროცესს და მეტი ალბათობით, თქვენ შეძლებთ მაღალი ხარისხის პროდუქტის შექმნას.
4. 4. დამზადეთ ვიდეოები კომპანიებისათვის: ბრენდებისათვის შექმნილი ვიდეო კონტენტი არამარტო თქვენი საქმისთვის შეიძლება იყოს მომგებიანი, არამედ თვითონ კომპანიებისთვისაც. მაგალითად, თუ თქვენ უკვე ხართ წარმატებული ვიდეო-ბლოგერი და გსურთ, რომელიმე კომპანიის პროდუქტის ფლეისმენთის გაკეთება თქვენს ვიდეო-სერიებში, შეგიძლიათ დაუკავშირდეთ ამა თუ იმ კომპანიას და მოლაპარაკების შემთხვევაში მიიღოთ ამის უფლება.

თქვენ გაეცანით (არსებული თუ მომავალი) პარტნიორებისთვის განკუთვნილ 10 ძირითად სტრატეგიას, რომელიც ხანგრძლივი და წარმატებული თანამშრომლობისკენ გადადგმული ნაბიჯია.

ვიდეოს პარამეტრები

ვიდეოს თანმხლები ინფორმაციის შესაცვლელად არსებობს ვიდეოს პარამეტრები, რაც გამოიყენება შემდეგი ცვლილებების განსახორციელებლად:

• ვიდეოს სათაურის შესაცვლელად

სათაური უნდა იყოს მოკლე და მარტივად გასაგები.

• ვიდეოს აღწერილობის შესაცვლელად

აღწერაში უნდა მიუთითოთ, თუ რას ეხება ვიდეოს შინაარსი. იყავით ლაკონურნი და ეცადეთ შინაარსის 2-3 წინადადებაში გადმოცემა. იმ შემთხვევაში კი, თუ მიგაჩნიათ, რომ ვრცელი აღწერილობაა საჭირო, ამისათვის myvideo.ge გაძლევთ 2000 სიმბოლოს ლიმიტს. აღწერაში გამოიყენეთ თემატური #ჰეშტეგები, რათა თქვენი ვიდეოს მოძებნა მარტივი იყოს.

• ვიდეოს ტიპის შესაცვლელად (საჯარო/პირადი)

ვიდეოები შეიძლება იყოს პირადი ან საჯარო. პირადი ვიდეოები ხელმისაწვდომია აუდიტორიისთვის მხოლოდ პირდაპირი ბმულით. ხოლო, საჯარო ვიდეოები ჩანს ძიების რეზულტატებში და კატეგორიების ჩამონათვალში.

• ფლეილისტების შესაცვლელად

ვიდეოს ადგილმდებარეობის შეცვლა ერთი ფლეილისთიდან მეორეში მარტივად ხორციელდება. ფლეილისტის ღილაკზე დაჭერისას ჩამოიშლება თქვენმიერ შექმნილი ფლეილისტების სია. სასურველი ფლეილისტის მონიშვნით ვიდეო შეიცვლის ადგილმდებარეობას.

• კომენტარების ფორმის შესაცვლელად

myvideo.ge-ზე კომენტარების 2 ფორმა მიიღება: Facebook კომენტარები და Myvideo კომენტარები. მომხმარებელს აქვს საშუალება აირჩიოს სასურველი ფორმა ან სულაც უარი თქვას ამ ფუნქციაზე „გათიშე კომენტარები“-ს მონიშვნით. Facebook კომენტარები.

და აგრეთვე:

• ვიდეოსთვის არხის მთავარი ვიდეო-ს სტატუსის მისანიჭებლად

ეს ფუნქცია საშუალებას იძლევა, რომ თქვენმიერ არჩეული რომელიმე ერთი ვიდეო დააფიქსიროთ პირველ ვიდეოდ თქვენს გვედზე და გახადოთ ის თქვენი არხის ,,საჩვენებელი ვიდეო’’.

• ვიდეოს წასაშლელად

ვიდეოს წასაშლელად უნდა დააჭიროთ ღილაკს ,,წაშლა’’ და შემდეგ დაადასტუროთ თქვენი გადაწყვეტილება ღილაკ ,,OK’’-ზე დაკლიკებით.

• ანოტაციების რედაქტირება

ეს ფუნქცია საშუალებას გაძლევთ ვიდეოს დაურთოთ ტექსტი, 200 სიმბოლოს ლიმიტით, ან/და დაურთოთ myvideo.ge-ს ნებისმიერი შიდა ბმული. ტექსური ანოტაცია და ბმულები უმეტესად იმ შემთხვევაში გამოიყენება, თუ მომხმარებელს სურს მაყურებლის ყურადღება გაამახვილოს რაიმე საკითხეზე ან შესთავაზოს მაყურებელს სხვა, შესაძლოა მსგავსი, ვიდეო.

• ვიდეოს ფონის სურათის დამატება

ეს ფუნქცია გამოიყენება იმ შემთხვევაში, თუ მომხმარებელს სურს ვიდეოს ფონად დაადოს ფოტოსურათი ან სქრინშოთი. ამ ფუნქციის გამოყენების შემთხვევაში ვიდეო გამოჩნდება არჩეული ფონის სურათით როგორც ძიების რეზულტატებში, ასევე მისი გაზიარების შემთხვევაშიც. აუცილებელი პირობა ფოტოსურათის ან სქრინშოთის დასამატებლად არის მათი პარამეტრები:

• მაქს. ზომა : 5MB
• მინ. გაფართოვება : 395x223 px
• ფორმატი: JPG, PNG.

ამავე ღილაკის გამოყენება შეგიძლიათ ლუპების შესაქმნელად, რომლებიც საკმაოდ პოპულარულია თუ მასში სწორი მომენტია აღბეჭდილი, ეს შეგიძლიათ თქვენი ვრცელი ვიდეოს მოკლე ანონსადაც გამოიყენოთ.

სასარგებლო ბმულები:

ვიდეოს რედაქტირებისა და მიმზიდველი კონტენტის შესაქმნელად, შეგიძლიათ გამოიყენოთ შემდეგი უფასო ონლაინ პროგრამები:

• Magisto: http://www.magisto.com/video/upload
• Befunky (ფონის სურათების დასამუშავებლად) https://www.befunky.com/
• Youtube audio library (უფასო მუსიკის დიდი არჩევანი) - www.youtube.com/audiolibrary/music
• უფასო სურათების ბიბლიოთეკა - https://www.pexels.com/

პარტნიორული სისტემა განკუთვნილია მხოლოდ მათთვის, ვინც ავრცელებს საკუთარ შექმნილ ვიდეომასალას ან ისეთ მასალას, რომელზედაც მოპოვებული აქვს გავრცელების ლიცენზია. ეს არის აუცილებელი და ყველაზე მნიშვნელოვანი პირობა იმისთვის, რომ ამა თუ იმ მომხმარებელმა მიიღოს და შეინარჩუნოს პარტნიორის სტატუსი.

ამ წესის დარღვევის შემთხვევაში, პარტნიორს ეგზავნება გაფრთხილება, 3 გაფრთხილების შემდეგ კი ავტომატურად ხდება პარტნიორის სტატუსის ჩამორთმევა.

იმისათვის, რომ ეს თქვენს არხს არ დაემუქროს, გაითვალისწინეთ შემდეგი რჩევები:

1. „სლაიდშოუ“ არ არის ვიდეო. სხვადასხვა სურათების გაერთიანებით თქვენ ვერ მოიპოვებთ პარტნიორის სტატუსს, ან თუ უკვე გაქვთ, მიიღებთ გაფრთხილებას.

2. ვიდეოს ხმოვანი კომენტარებით ან სუბტიტრებით გახმოვანების შემთხვევაში, თქვენ არ გენიჭებათ ამ ვიდეოს გავრცელების უფლება. შესაბამისად მსგავს შემთხვევაში ასევე მიიღებთ გაფრთხილებას.

3. პარტნიორის სტატუსის მიღების შემთხვევაში აუცილებელია, რომ ვიდეო განთავსდეს ექსკლუზიური ნიშნის ქვეშ საიტზე myvideo.ge (რომელიც ავტომატურად ენიჭება ვიდეოებს სტატუსის მინიჭების შემდეგ) და სხვა საიტზე განთავსდეს მხოლოდ ექსკლუზიური ნიშნით.

4. თუკი თქვენი ვიდეო თამაშების კატეგორიაშია, აუცილებელია რომ მას ახლდეს ხმოვანი კომენტარები ქართულ ენაზე. ეს არ ვრცელდება ინტროს შემთხვევაში.

ის, რომ პოპულარული არხების უმრავლესობას არ აქვს საკუთარი კონტენტი განთავსებული, არ ნიშნავს იმას, რომ ისინი წესებს არღვევენ, რადგან:

ა) პოპულარული არ ნიშნავს იმას, რომ ის არხი აპრიორი პარტნიორია

ბ) არსებობს ბრენდირებული არხები და პარტნიორი არხები, რომლებს შორის განხვავება იუზერებისთვის შეუმჩნეველია, რადგან ერთნაირად გამოიყურებიან. განსხვავება მათ შორის არის ის, რომ ბრენდირებული არხის მიღება ყველას შეუძლია კრიტერიუმების დაკმაყოფილების შემდეგ ავტომატურად, ხოლო პარტნიორის სტატუსის მიღება მხოლოდ ადმინისტრაციის თანხმობით არის შესაძლებელი. ბრენდირებული არხები შემოსავალს არ იღებენ, შესაბამისად მათთვის აუცილებელი არ არის უნიკალური კონტენტის გავრცელება.

პარტნიორის სტატუსის მოთხოვნაზე მომხმარებელი თანხმობას არ მიიღებს იმ შემთხვევაში, თუ:

მომხმარებელი არღვევს myvideo.ge -ს ძირითადი სამომხმარებლო შეთანხმების პრინციპებს (სამომხმარებლო შეთანხმების უახლესი ვერსია ხელმისაწვდომია ბმულზე: http://www.myvideo.ge/?act=inc&p=agreement);

მომხმარებლის მიერ ატვირთული ვიდეორგოლების ძირითადი ნაწილი შედგება სხვადასხვა ვიდეოს უბრალო მონტაჟის ან ფოტოკოლაჟისაგან (სლაიდშოუ);

განთავსებული ვიდეომასალა არ არის არხის მფლობელის მიერ შექმნილი;

მომხმარებლის გვერდზე არ არის ატვირთული მინიმუმ 5 უნიკალური ვიდეორგოლი;

მომხმარებლის მიერ ატვირთული ვიდეორგოლები არ სარგებლობენ პოპულარობით;

მომხმარებლის მიერ ატვირთული ვიდეორგოლების პოპულარობა გაზრდილია ხელოვნურად, დამხმარე პროგრამების გამოყენებით.

ამასთანავე, ადმინისტრაცია იტოვებს უფლებას განსაკუთრებულ შემთხვევებში დაუშვას გამონაკლისები და საკუთარი გადაწყვეტილების საფუძველზე მიანიჭოს ან ჩამოართვას მომხმარებლის არხს პარტნიორის სტატუსი მიზეზის ახსნის გარეშე.

პარტნიორის სტატუსის მინიჭების შემდეგ, ვიდეორგოლების ნახვის რაოდენობის ხელოვნურად გაზრდის შემთხვევაში myvideo.ge -სადმინისტრაცია უფლებამოსილია მომხმარებელს გაუფრთხილებლად გაუთიშოს პარტნიორის სტატუსი. თაღლითური გზით გამომუშავებული თანხა ავტომატურად ჩამოიჭრება პარტნიორის ანგარიშიდან.

პარტნიორის სტატუსის მქონე მომხმარებელს ეკრძალება ერთხელ დადებული ვიდეოს წაშლა და მისი ხელახლა დადება ვიდეოს პოპულარობის გაზრდის მიზნით.

პარტნიორის სტატუსის მინიჭების შემდეგ აკრძალულია არხის თემატიკის ცვლილება. ასეთ შემთხვევაში მომხმარებელმა უნდა მიმართოს myvideo.ge -სადმინისტრაცას ახალი არხის მოთხოვნით.