საქართველოს განათლებისა და მეცნიერების სამინისტროს წარმომადგენლები ავრცელებენ ვიდეოკადრებს, რომელშიც, მათი მტკიცებით, სახეზეა თუ როგორ იმართება 53-ე საჯარო სკოლაში არსებული სიტუაცია გარკვეული ჯგუფების მიერ.
"53-ე საჯარო სკოლაში პროცესების გარედან მართვა აშკარაა", - აცხადებენ სამინისტროში.
განათლების სამინისტროს მიერ გავრცელებული განცხადების თანახმად, კადრებში ნათლად ჩანს გათავისუფლებული დირექტორის მოადგილე, შორენა ნოდარიშვილი-გამყრელიძე, რომელიც სასწავლო პროცესის მიმდინარეობაზე ნაკისრი პასუხისმგებლობის მიუხედავად, მიზანმიმართულად შლიდა გაკვეთილებს.
"ვიდეოში ასახულია, თუ როგორ უშლიდნენ ხელს გაფიცული მასწავლებლები იმ პედაგოგს, რომელსაც სურდა გაკვეთილის ჩატარება. ადგილი ჰქონდა ასევე სიტყვიერ შეურაცხყოფას. ყოფილი დირექტორის, მარიამ რამინაშვილის და, ლიკა რამინაშვილი ორგანიზებას უწევდა 53-ე სკოლის წინ დღეს გამართულ აქციას, უზრუნველყოფილი იყო გაფიცული მოსწავლეებისთვის წარწერიანი მაისურები და საკვები.
განათლებისა და მეცნიერების სამინისტრო კიდევ ერთხელ განმარტავს, რომ საქართველოს კონსტიტუციის 35-ე მუხლითა და „ზოგადი განათლების შესახებ“ საქართველოს კანონის მე-9 მუხლით აღიარებული და დაცულია ნებისმიერი პირის მიერ ზოგადი განათლების მიღების უფლება. სხვადასხვა ტიპის ფაქტორი, რომელიც უარყოფით ზეგავლენას ახდენს სასწავლო პროცესზე არღვევს პირის უფლებას მიიღოს ზოგადი განათლება. ამდენად, სასწავლო პროცესის ხელოვნურად ჩაშლა გულისხმობს საქართველოს მოქმედი კანონმდებლობის დარღვევას, რაც იწვევს შესაბამის პასუხისმგებლობას", - აცხადებენ სამინისტროში.