აღდგომის წინა დღეს - დიდ შაბათს, იერუსალიმში, მაცხოვრის საფლავზე მადლმოსილი ცეცხლის გარდამოსვლის სასწაული წელსაც მოხდა, თბილისის დროით, დაახლოებით 15:16 საათზე.

წმინდა ცეცხლის ლიტანიობა დიდი შაბათის მწუხრის მსახურებას უკავშირდება. ეს ის დღეა, როდესაც უფალი ჯოჯოხეთში ჩავიდა და მრავალი განსვენებული წმინდანის სხეული აღდგა. აღნიშნული მსახურება დღისით, თბილისის დროით, დაახლოებით, 13:00-14:00 საათზე აღესრულება ხოლმე.
სამლოცველოში შესვლისას მართლმადიდებელი ეკლესიის პატრიარქი მაცხოვრის საფლავს მუხლმოდრეკით მიეახლება და გულმოდგინედ ლოცულობს, რომლის დროსაც ცეცხლის გადმოსვლის სასწაული ხდება.

ცეცხლი გადმოსვლისას, ტაძრის მთელ სივრცეს მოცისფრო ელვა ანათებს. ის ხან კუვუკლიას ეფინება, ხან ელვასავით ეცემა კედელს.

მაცხოვრის საფლავზე გადმოსული ცეცხლი თბილია და არ წვავს. დაახლოებით, 10-15 წუთის განმავლობაში მას ჩვეულებრივი ცეცხლის თვისებები არ გააჩნია. რამდენიმე წუთის განმავლობაში მორწმუნეები მას თავზე იტარებენ.

ცეცხლის გადმოსვლის ამსახველ პირდაპირ ტრანსლაციას საზოგადოებრივი მაუწყებლის პირველი არხით მიმდინარეობდა, საქართველოდან წასული მომლოცველთა ჯგუფი კი, სასწაულს მაცხოვრის საფლავზე ელოდებოდა.

მორწმუნეები მაცხოვრის საფლავთან ადგილს წინა დღით - წითელ პარასკევს იკავებენ. ისინი მთელ ღამეს ლოცვაში ატარებენ. სანთლებს კონებად კრავენ. თითოეულ კონაში მაცხოვრის მიწიერი ცხოვრების წელთა აღსანიშნავად 33 სანთელია. საღამოს ყველა კანდელსა და სანთელს აქრობენ. ტაძარი მთელი ღამე ჩაბნელებულია.
©INFO9.GE