ჩიტაძის ქუჩაზე სამართალდამცველებმა მოქალაქე იური კვარაცხელია დააკავეს. ის N47-ე საჯარო სკოლასთან, ცეცხლსასროლი იარაღიდან სროლის გამოა დაკავებული.

როგორც კვარაცხელია აცხადებს, რამდენიმე მეგობართან ერთად, აღდგომის დღესასწაულს აღნიშნავდა და ერთ-ერთი სადღეგრძელოს დროს, ჰაერში რამდენჯერმე გაისროლეს.

დაკავებულის თქმით, ის ომის ვეტერანია. შესაბამისად, ჰაერში გასროლა ომში დაღუპული გმირების გასახსენებლად გადაწყვიტეს.

„ვეტერანები შევიკრიბეთ, კარგად დავლიეთ და ჩვენი ბიჭები გავიხსენეთ. ხსოვნის სადღეგრძელოს შემდეგ ჰაერში ვისროლეთ“, - განაცხადა კვარაცხელიამ დაკავების დროს.

ჩიტაძის ქუჩაზე ცეცხლსასროლი იარაღიდან დღეს ისროლეს. ინციდენტი N47-ე საჯარო სკოლასთან დაახლოებით, 09:30 საათზე მოხდა.

შინაგან საქმეთა სამინისტროს ინფორმაციით, არაფხიზელ მდგომარეობაში მყოფმა მამაკაცმა ჰაერში გაისროლა. მომხდარზე დაწყებულია გამოძიება.