2014 წლის დეკემბერში დავით სერგეენკომ გამოაცხადა, რომ 2015 წლის 1 აპრილიდან სოციალურად დაუცველი მოსახლეობის აღწერის ახალი მეთოდოლოგია შევიდოდა ძალაში, ხოლო ახალი მეთოდოლოგიით დახმარებადანიშნულ ოჯახები ყოველ ბავშვზე 10-ლარიან დანამატს მიიღებდნენ.

ახლა მთავრობამ ეს ვადა 1-ლ მაისამდე გადაწია. თუმცა ჯანდაცვის სამინისტრო აღიარებს, რომ 2015 წლის 1 მაისიდანაც ვერ დაიწყებს სოციალური დახმარების მიმღები ოჯახების ყველა ბავშვზე 10-ლარიანი დანამატის გაცემას.

ამჟამად დახმარებას სულ 140,000 ოჯახი იღებს. ჯანდაცვის სამინისტრომ განვლილ 3 თვეში 5000 ოჯახის გადამოწმებაც ვერ მოასწრო, რაც იმას ნიშნავს, რომ 140,000 ოჯახის გადამოწმება წლობით გაიწელება. გაჭირვებული ოჯახები კი 10-ლარიან დახმარებას წლობით ვერ დაელოდებიან.

ერთიანი ნაციონალური მოძრაობა მიიჩნევს, რომ მთავრობის არაკომპეტენტურობისა და ახალი მეთოდოლოგიით სოციალურად დაუცველთა ოჯახების გადამოწმების ნელი ტემპის გამო ეს ოჯახები და იქ მცხოვრების ბავშვები არ უნდა დაზარალდნენ. მით უმეტეს, რომ დავით სერგეენკოს მიერ დაანონსებულ ბავშვის 10-ლარიან დანამატს უკვე აკლდება მსყიდველუნარიანობა ლარის კურსის ვარდნისა და საკვებსა და მედიკამენტებზე ფასების მატების გამო.