26 ივლისიდან პირველ აგვისტომდე საქართველოს დედაქალაქი მასშტაბურ სპორტულ ღონისძიებას - ევროპის ახალგაზრდულ ოლიმპიურ ფესტივალს „თბილისი 2015“ უმასპინძლებს.
„თბილისი 2015“-ის მოსამზადებელი სამუშაოების გასაცნობად ევროპის ოლიმპიური კომიტეტების საკოორდინაციო კომისიის წევრები, 50 ქვეყნის ტექნიკური დელეგატი და ოლიმპიური კომიტეტების წარმომადგენლები ჩამოვიდნენ. მათ მშენებარე და განახლებული სპორტული არენები, ასევე, ოლიმპიური სოფელი დაათვალიერეს და შედეგით კმაყოფილები არიან.

სტუმრებმა შემაჯამებელ პრესკონფერენციაზე იმედი გამოთქვეს, რომ ყველა სამუშაო დროულად დასრულდება და ევროპის ახალგაზრდული ოლიმპიური ფესტივალი „თბილისი 2015“ ღირსეულად ჩატარდება.

თავის მხრივ კი, ევროპის ახალგაზრდული ოლიმპიური ფესტივალის საორგანიზაციო კომიტეტის თავმჯდომარე ალექსი ახვლედიანი აცხადებს, რომ კომიტეტი ყველაფერს აკეთებს, რათა „თბილისი 2015“ ევროპის ოლიმპიურ ოჯახში შევიდეს, როგორც ერთ-ერთი საუკეთესო ოლიმპიური ფესტივალი.