დავასრულეთ შეხვედრა კომუნიკაციების ეროვნული მარეგულირებელი კომისიის თავმჯდომარესთან, ბატონ ვახტანგ აბაშიძესთან და როგორც წინასწარ შეგპირდით მზად ვარ საჯაროდ გაგიზიაროთ მარეგულირებლის პოზიცია რუსულ კომპანია ,,ვიმპლეკომთან’’ დაკავშირებით, რომელსაც რამდენიმე დღის წინ დავოსში შეხვდა პრემიერ–მინისტრი.
ევროპიდან (ბულგარეთი, ქ. ვარნა) შავი ზღვით მომავალი საკომუნიკაციო სადენის შესაძლო გასხვისების თაობაზე ჩვენი და მარეგულირებელი კომისიის მოსაზრებები ერთმანეთს დაემთხვა. ორივე ვფიქრობთ, რომ სადენის გასხვისების შემთხვევაში კიდევ უფრო მეტი საფრთხის წინაშე დადგება ქართული სახელმწიფოს ინტერესები.
რამდენადაც ჩვენთვის გახდა ცნობილი მოლაპარაკებების წარმოება დიდი ხანია მიმდინარეობს სხვადასხვა პარტნიორებს შორის და მიუხედავად იმისა, რომ მხარეები წარმოადგენს კერძო სამართლის სუბიექტებს, კომისიის ხელმძღვანელის შეფასებით საკითხი არ არის მხოლოდ კერძო სუბიექტების გადასაწყვეტი და მარეგულირებელი კომისია გადაწყვეტილებას მიიღებს ქვეყნის ინტერესებიდან გამომდინარე.
მინდა გითხრათ, რომ ევროპიდან მომავალი სადენის გასხვისებას მხარს არ უჭერს კომისია. აღნიშნულ საკითხთან დაკავშირებით ჩვენ კვლავ განვახორციელებთ მონიტორინგს და საფრთხის გამოვლენის შემთხვევაში გვექნება მკაცრი რეაქცია.