ერთ თურქულ სიმღერას ვმღეროდი, რომლის მელოდიაც და ტექსტიც ჩემი იყო. შავი ზღვის მხარის ქალაქებში _ ტრაპიზონში, რიზეში ის კარგად მიიღეს და პირველად მან მომიტანა პოპულარობა. ამის შემდეგ კიდევ ერთი სიმღერა ვიმღერე და მერე უკვე „ჯინველო“ და „ელია გოგო“. ამათ შემდეგ ვიმღერე „გელინო“. საქართველოში პირველად „ელია გოგოთი“ გამიცნეს, მაგრამ ის „გელინო“-სავით პოპულარული არ გამხდარა. „გელინოს“ პოპულარობა გიორგი კალანდიას დოკუმენტურმა ფილმებმა _ „ჩვენებურებმა“ მოუტანა, რადგან იქ იყო ეს კლიპი გამოყენებული. ასეთი რაღაც გავიგე ბათუმში, შენ „გელინო“ რომ იმღერე, მას მერე საქართველოში პატარძალსა და დედამთილს შორის ჩხუბი აღარ ყოფილაო. ალბათ იცით, რომ გელინო პატარძალს ნიშნავს.