გარემოსა და ბუნებრივი რესურსების დაცვის მინისტრი გიგლა აგულაშვილი სამინისტროსა და კომპანია „ჯეოსელის“ ერთობლივი პროექტის „ქვეყნის #მოვლა მობილური ინტერნეტით“ პრეზენტაციას დაესწრო. აქცია მცხეთის რკინიგზის ბაქანზე გაიმართა.
ახალი პლატფორმის ფარგლებში ყველა მსურველს საშუალება აქვს სპეციალური აპლიკაციის საშუალებით მონიშნოს დანაგვიანებული ადგილები და მობილური ინტერნეტის მეშვეობით გაუზიაროს სხვებს.
აქციაზე საკომუნიკაციო ვიდეო რგოლის და აპლიკაციის „მოვლა“ პრეზენტაცია გაიმართა.
აქციის მიზანია საზოგადოების ჩართულობა ქვეყნის მოვლაში, დანაგვიანებული ადგილების დასუფთავება და გარემოს დაბინძურების თავიდან აცილება. პროექტი მოიცავს საქართველოს ყველა რეგიონს.
პრეზენტაციაზე გარემოსა და ბუნებრივი რესურსების დაცვის მინისტრი გიგლა აგულაშვილი, ჯეოსელის გენერალური დირექტორი პაველ სმალინსკი, საქართველოს ტურიზმის დეპარტამენტის თავმჯდომარე გიორგი ჩოგოვაძე და National Geographic-ის მთავარი რედაქტორი ლევან ბუთხუზი ესწრებოდნენ.