#სტიქია #ბორჯომი #მორჯომისსტიქია

ბორჯომის მუნიციპალიტეტის მოსახლეობა ძლიერმა წვიმამ და სეტყვამ დააზარალა. მოსახლეობის ნაწილს ელექტროენერგია არ მიეწოდება. როგორც „ინფო 9“-ს ბორჯომში ერთ-ერთი საზაფხულო კაფე-ბარის მეპატრონე ზაზა დოქსანოვმა განუცხადა, სტიქია დაახლოებით, 20 წუთის განმავლობაში გრძელდებოდა. „საშინელი პანიკა იყო. ხალხი შეშინდა, სად შეეფარებინათ თავი არ იცოდნენ. დუბაელმა ტურისტმა ამ არეულობაში შვილი დაკარგა. ეს ქალი პანიკაში იყო და შეშლილივით დარბოდა ყვირილით წვიმასა და სეტყვაში. საშინელი სტიქიის და არეულობის მიუხედავად, ბავშვი მოვძებნეთ და დედას დავუბრუნეთ.

დედა-შვილი და პარკიდან გამოქცეული დამსვენებლები ბარში შევიფარეთ, მაგრამ მთებიდან წამოსულმა ნიაღვარმა შენობაშიც შემოაღწია და დატბორა. ზარალი მოსახლეობაშიც იქნება. მე ასეთი წვიმა და სეტყვა არ მახსოვს. საკანალიზაციო სისტემამ წყალი ვეღარ გაატარა და ქუჩები დატბორა. ამ დროისთვის ქალაქში ელექტორენერგია გათიშულია“,- აღნიშნა ზაზა დოქსანოვმა.

ძლიერმა წვიმამ და სეტყვამ გუშინ ახალციხის მოსახლეობაც დააზარალა. რამდენიმე დღის წინ მოსულმა უხვმა ნალექმა კი, დედაქალაქში გადაადგილების პრობლემა შექმნა.