ზაფხულის სატრანსფერო ფანჯარა დაიხურა. ბოლო დღეებში, მოვლენების ეპიცენტრი პრემიერ ლიგა იყო, რადგან მთავარი ამბები, სწორედ, ნისლიან ალბიონზე ხდებოდა ან უნდა მომხდარიყო.
ბოლო დღეს გადაწყდა ნიუკასლიდან საფრანგეთის ნაკრების ნახევარმცველის - მუსა სისოკოს ტრანსფერის საკითხი. 27 წლის ფრანგი ტოტენჰემმა 30 მილიონ ევროდ შეიძინა.
პარი სენ-ჟერმენში გატარებული ორი წლის შემდეგ, დავიდ ლუიზი კვლავ პრემიერ ლიგაში, ჩელსიში დაბრუნდა. ლუიზის დასაბრუნებლად არისტოკრატებმა 32 მილიონი გადაიხადეს.
ყველასათვის მოულოდნელი იყო ჯეკ უილშირის ბორნმუთში წასვლა.
ინგლისის ჩემპიონმა - ლესტერმა საკუთარი სატრანსფერო რეკორდი მიმდინარე ზაფხულს უკვე მეორედ მოხსნა და ლისაბონის სპორტინგიდან ალჟირელი თავდამსხმელი - ისლამ სლიმანი 29 მილიონ ევროდ შეიძინა.