საქართველოში ვიზიტის ფარგლებში, ევროპაში აშშ-ის არმიის სარდალი, გენერალ-ლეიტენანტი ბენ ჰოჯესი ოკუპირებული ტერიტორიის მოსაზღვრე სოფელში ჩავიდა. ამერიკელ გენერალთან ერთად საოკუპაციო ხაზი საქართველოს შეიარაღებული ძალების გენერალური შტაბის უფროსმა, გენერალ-მაიორმა ვახტანგ კაპანაძემ და საქართველოში აშშ-ის ელჩმა იან კელიმ მოინახულეს.
სტუმრები სოფელ ხურვალეთთან და ადმინისტრაციულ სასაზღვრო ხაზთან შექმნილ ვითარებას გაეცნენ. გენერალ-ლეიტენანტი ჰოჯესი საოკუპაციო ხაზის მეორე მხარეს დარჩენილ ოჯახსაც გაესაუბრა და მათი პრობლემები მოისმინა.
„დღეს პირველად ვეწვიე ადმინისტრაციულ სასაზღვრო ხაზს. სასიხარულოა, რომ ევროკავშირის სადამკვირვებლო მისია აქ არის და თავის საქმეს აკეთებს. საოცარია, რომ მათ არა აქვთ შესაძლებლობა სასაზღვრო ხაზის მეორე მხარეს გადავიდნენ და დააკვირდნენ სიტუაციას. თუმცა, ეს კიდევ ერთხელ ცხადყოფს, რომ საქართველო ტრანსპარენტულად მოქმედებს და დამკვირვებლების აქ ყოფნას მხოლოდ და მხოლოდ მიესალმება. ასევე, მნიშვნელოვანია გავერკვეთ ადგილობრივ გეოგრაფიაში და იმაში, თუ როგორ დაიცავს საქართველო თავს. ჩვენ აქ ვიმყოფებით, რათა მხარი დავუჭიროთ საქართველოს ძალისხმევას და შევთავაზოთ მას ისეთი რჩევები, რომლებიც საქართველოს დაეხმარება უფრო ეფექტურად დაიცვას საკუთარი უსაფრთხოება“ - განაცხადა გენერალ-ლეიტენანტმა ბენ ჰოჯესმა.