#სპორტი #ტენისი - "ვიენა ოუფენზე", რომლის საპრიზო ფონდი 1,8 მილიონი ევროა, ქართველმა ჩოგბურთელმა ნიკოლოზ ბასილაშვილმა უდიდესი სენსაცია მოახდინა მსოფლიოს მე-10 ჩოგანი, ჩეხი ტომაშ ბერდიხი დაამარცხა - 6:4, 6:7 (5), 7:5. ეს შეხვედრა ტურნირის პირველ წრეში გაიმართა, სადაც მსოფლიოს 107-ე ჩოგანი საკვალიფიკაციო ბადიდან მოხვდა, ხოლო ბერდიხი მე-2 ნომრად იყო განთესილი.
ბრძოლა ორსაათნახევარს გასტანა და ქართველი ჩოგბურთელი გამარჯვებასთან რამდენჯერმე იყო ახლოს, თუმცა ჯერ მე-2 სეტი დათმო ტაი-ბრეიკში, შემდეგ მეტოქეს 4:1 "ამოაქაჩინა". საბოლოოდ, ჩვენებურმა მაინც გატეხა სახელოვანი მეტოქე და მეორე წრეში გავიდა.
ბასილაშვილის მორიგი მეტოქე რუსი კარენ ხაჩანოვია (63). ჩვენებურმა უკვე გამოიმუშავა 65 ქულა (20 საკვალიფიკაციოს მოგებისთვის) და 25 ათასი ევრო.