შეცვალე კლიმატის ცვლილება - „დედამიწის საათის“ მეათე რაუნდი მსოფლიოში 2017 წლის 25 მარტს აღინიშნა. ადგილობრივი დროით, საღამოს 20:30 საათიდან, კამპანიამ მთელი დედამიწა მოიცვა.

ეს მსოფლიოში უდიდესი გარემოსდაცვითი აქციაა, რომლის დროსაც მილიონობით ადამიანი ერთი საათით ელექტროენერგიის გამოყენებაზე უარს აცხადებს და ამით პლანეტის მწვანე და უსაფრთხო მომავლის მხარდაჭერას გამოხატავს.

გარემოსა და ბუნებრივი რესურსების დაცვის სამინისტროს ინიციატივით, „დედამიწის საათი“ დედაენის ბაღში აღინიშნა. ღონისძიებაზე მოსულ სტუმრებს მინისტრმა გიგლა აგულაშვილმა, გაეროს ელჩის მოადგილემ შომბი შარპმა და ქალაქ თბილისის მერმა დავით ნარმანიამ მიმართეს. კამპანიის მნიშვნელობაზე ასევე ისაუბრეს ბუნების დაცვის მსოფლიო ფონდის (WWF) და კავკასიის გარემოსდაცვითი არასამთავრობო ორგანიზაციების ქსელის (CENN) ხელმძღვანელებმა.

კამპანიის ფარგლებში, დედაენის ბაღში დრამერების შოუ გაიმართა, ,,სეუ არტ პროჯეკტის" მოცეკვავეებმა ორიგინალური საცეკვაო ნომერი წარმოადგინეს.

ასევე, საღამო მუსიკალურად ჯგუფმა “Loudspeackers” გააფორმა. ღონისძიების მონაწილეებმა ფოსფორის მანათობელი საღებავებით სახე მოიხატეს.

ღონისძიება კავკასიის გარემოსდაცვითი არასამთავრობო ორგანიზაციების ქსელის (CENN), ბუნების დაცვის მსოფლიო ფონდის (WWF) და ქალაქ თბილისის მერიის მხარდაჭერით გაიმართა.

ღონისძიების მთავარი მიზანია კლიმატის ცვლილების შესახებ ინფორმაციის მიწოდება, საზოგადოების გარემოსდაცვითი ცნობიერების ამაღლება, პასუხისმგებლობის გაზრდა, საკუთარი ქცევის შეფასება და შეცვლა გარემოს სასარგებლოდ.

ერთი საათის განმავლობაში შუქი ჩაქრა - საქართველოს მთავრობის კანცელარიის შენობაში, პრეზიდენტის რეზიდენციაში, გარემოსა და ბუნებრივი რესურსების დაცვის სამინისტროსა და სხვა სამინისტროების შენობებში, გაეროს სახლში, საქართველოს პარლამენტის შენობაში, შოთა რუსთაველის სახელობის აკადემიურ თეატრში, მოსწავლე-ახალგაზრდობის სასახლეში, მშვიდობის ხიდზე, აღმაშენებლის გამზირზე - თამარ მეფის გამზირიდან პასტერის ქუჩამდე, კარგარეთელისა და ბაქოს ქუჩებს შორის, მარჯანიშვილის მოედნიდან ზაარ ბრიუკენის მოედნამდე, მარჯანიშვილის მოედანზე, მეტრო მარჯანიშვილის მიმდებარე ტერიტორიაზე, ვარდების ბაღში, ახალ აღმაშენებელზე. ასევე გამოირთო საჯარო რეესტრის შენობის, მეჩეთის, ნარიყალას, საპატრიარქოს შენობის, მეტეხის ხიდის, ზემო და ქვემო ბეთლემის, ფერიცვალების ეკლესიის, ტელეანძის, ქართლის დედის და თავისუფლების მოედანზე მდებარე წმინდა გიორგის მონუმენტის მინათება. შუქი ჩაქრა ბალნეოლოგიური კურორტის, წითელი ჯვრის შენობაში, დედაენის ბაღში და სხვა კერძო ორგანიზაციებში. აქციის ფარგლებში, თბილისის სატელევიზიო ანძა მთელი ღამის განმავლობაში მწვანედ განათდა.

კამპანია "ერთი საათის ფარგლებს" უკვე გასცდა და მიზნად ცხოვრების წესად დამკვიდრებას ისახავს.