ბორჯომის მუნიციპალიტეტში, სოფელ დაბის მიმდებარე ტერიტორიაზე, მთის ფერდობზე გაჩენილი ხანძარი ლიკვიდირებულია. ხანძრის ცალკეული, მცირე კერების ლიკვიდაცია-დამუშავება კი უწყვეტ რეჟიმში მიმდინარეობს.
საგანგებო შტაბი ბორჯომის ხეობაში მუშაობას აგრძელებს.
შტაბის ხელმძღვანელი, შს მინისტრი გიორგი მღებრიშვილი ხანძრის კერებზე სალიკვიდაციო და პრევენციის მიზნით მიმდინარე სამუშაოებს გაეცნო.
წარმატებით განხორციელებული სამუშაოების შედეგად, ხანძრის ცალკეული, მცირე კერების რაოდენობამ მნიშვნელოვნად იკლო. ამის გამო, საგანგებო შტაბმა გადაწყვეტილება მიიღო ცოცხალი ძალისა და სახანძრო ტექნიკის შემცირების შესახებ.
საქართველო დატოვა აზერბაიჯანის რესპუბლიკის 26 კაციანმა დესანტმა და 2-მა სადესანტო ვერტმფრენმა, ასევე, თურქეთის სატყეო-სახანძრო სამსახურის 2-მა ვერტმფრენმა და სახანძრო თვითმფრინავმა.
ხანძრის ქრობის პროცესში, საჰაერო ხანძარსაწინააღმდეგო ტექნიკის ჩართვის დღიდან, ამ დრომდე, ავიაციამ 2100-ზე მეტი რეისი განახორციელა. ხანძრის კერებზე საჰაერო ტექნიკამ დაასხა 5200 ტონაზე მეტი წყალი.
სოფელ დაბის მიმდებარე ტერიტორიას ეტაპობრივად ტოვებენ თავდაცვის სამინისტროს საჯარისო შენაერთები. ადგილზე სამხედრო მოსამსახურეების მხოლოდ ერთი ასეული დარჩება.
ხეობაში მუშაობას აგრძელებენ შსს-ს დანაყოფები, სახანძრო-სამაშველო ბრიგადები და ეროვნული სატყეო სააგენტოს თანამშრომლები, შესაბამის სპეცტექნიკასთან ერთად. ისინი ნახანძრალ ტერიტორიას გააკონტროლებენ და პრევენციულ ღონისძიებებს განახორციელბენ.