„მტკიცე მხარდაჭერის“ მისიის ჩრდილოეთ სარდლობაში მონაწილე ქვეყნების შეხვედრა
ნატოს თავდაცვის მინისტერიალის ფარგლებში, „მტკიცე მხარდაჭერის“ მისიის ჩრდილოეთ სარდლობაში მონაწილე ქვეყნების თავდაცვის მინისტრების შეხვედრა შედგა. გერმანიის თავდაცვის მინისტრის ორგანიზებით ალიანსის შტაბ-ბინაში გამართული შეხვედრის მთავარი მიზანი რეგიონში არსებული ვითარების შესახებ ინფორმაციის მიღება და სტაბილურობის შესანარჩუნებლად სამომავლო ღონისძიებების განსაზღვრა იყო.
ჩრდილოეთ სარდლობის (TAAC NORTH) დაქვემდებარებაში მონაწილე ქვეყნების თავდაცვის მინისტრებმა ავღანეთის ჩრდილოეთ რეგიონში არსებულ სამხედრო-პოლიტიკურ ვითარებაზე იმსჯელეს. რეგიონში არსებული გამოწვევების შესახებ მათ ინფორმაცია ავღანეთის თავდაცვის მინისტრმა, გენერალ-ლეიტენანტმა თარიქ შაჰ ბაჰრამიმ და „მტკიცე მხარდაჭერის“ მისიის სარდალმა, გენერალმა ჯონ ნიკოლსონმა მიაწოდეს.
შეხვედრაზე თავდაცვის მინისტრმა ლევან იზორიამ კიდევ ერთხელ ხაზგასმით აღნიშნა, რომ საქართველო ალიანსის წინაშე აღებული ვალდებულებების ერთგული რჩება და საერთაშორისო ოპერაციაში მონაწილეობას განაგრძობს. გლობალური უსაფრთხოების შენარჩუნების კუთხით ჩრდილოეთ სარდლობის დაქვემდებარებაში მონაწილე ქვეყნების თავდაცვის მინისტრებმა აქცენტი ქართველი მშვიდობისმყოფელების მიერ მისიის წარმატებით შესრულებაზე გააკეთეს და ყურადღება მაზარ-ი-შარიფში გერმანიის საკონსულოზე გახორციელებული თავდასხმისას ქართველი ჯარისკაცების მიერ გამოვლენილ პროფესიონალიზმზე გაამახვილეს.
ჩრდილოეთ სარდლობის დაქვემდებარებაში მონაწილე ქვეყნების თავდაცვის მინისტრების შეხვედრის დასრულების შემდეგ, მინისტრებმა და „მტკიცე მხარდაჭერის“ მისიის სარდალმა ერთობლივი ფოტო გადაიღეს.