საქართველოს მთავრობისა და სამთავრობო პროგრამისთვის ნდობის გამოცხადებამდე საქართველოს პარლამენტში კომიტეტების, ფრაქციების, უმრავლესობისა და უმცირესობის ფარგლებში მინისტრთა კაბინეტის მოსმენა მიმდინარეობს.
საპარლამენტო უმცირესობის სხდომაზე სამთავრობო პროგრამის წარდგენისა და სამომავლო გეგმებზე საუბრისას პრემიერ-მინისტრმა უსაფრთხოების მიმართულებით საქართველოს თავდაცვის სამინისტროში განხორციელებულ ფუნდამენტურ რეფორმაზე გაამახვილა ყურადღება. როგორც გიორგი კვირიკაშვილმა აღნიშნა, რეფორმის გაგრძელება ხდება და მთავარი აქცენტი ქვეყნის თავდაცვასა და უსაფრთხოებაზეა გადატანილი: „ჩვენ მთავარ აქცენტს უკვე ქვეყნის თავდაცვისუნარიანობის განმტკიცებაზე გავაკეთებთ და ამ მიმართულებით ძალიან დიდი ნაბიჯები იგეგმება. მნიშვნელოვანი შედეგებიც გვაქვს ხელშესახები. იგეგმება რეზერვის განახლებული სისტემის შექმნა და ნატოს სტანდარტებთან მთლიანად ამ სისტემის მიახლოება. მნიშვნელოვანია ასევე ის, რომ სამხედრო აღმშენებლობის საქმეში ჩართული იყოს ქვეყნის მოსახლეობა. რეზერვის სწორი სისტემა სწორედ, ფართო ჩართულობას უზრუნველყოფს“
პრემიერ-მინისტრმა საქართველოს თავდაცვისუნარიანობის განმტკიცების საქმეში საერთაშორისო თანამშორმლობაზეც ისაუბრა: „მომავალი წლიდან უმნიშვნელოვანესი პროგრამა იწყება. ჩვენ ორი პარალელური მიმართულებით ერთდროულად ვმუშაობთ - ეს არის ნატოში ინტეგრაციის ძირითადი პაკეტი და თავდაცვის მზადყოფნის პროგრამა, რომელიც ამერიკის შეერთებულ შტატებთან ერთად ხორციელდება. გასული წლების განმავლობაში საქართველოს თავსებადობა ნატოს შეირაღებულ ძალებთან მნიშვნელოვნად გაუმჯობესდა და დღეს ამ მიმართულებით მართლაც სამაგალითო მდგომარეობაა“.