საჩხერის სამთო მომზადების სკოლაში ზამთრის საბაზისო კურსი დასრულდა
პოლკოვნიკ ბესიკ ქუთათელაძის სახელობის საჩხერის სამთო მომზადების სკოლაში სამთო მომზადების ზამთრის საბაზისო კურსის გამოშვების ცერემონიალი გაიმართა. ღონისძიებას საქართველოს შეიარაღებული ძალების წვრთნებისა და სამხედრო განათლების სარდლობის შტაბის უფროსი, პოლკოვნიკი როინ ფაილოძე და უკრაინის თავდაცვის ატაშე, გენერალ-მაიორი იგორ ოსტაპენკო დაესწრნენ. მათ კურსში მონაწილე სამხედროებს სერტიფიკატები, სამკერდე ნიშნები, ხოლო წარჩინებულ კურსდამთავრებულებს საჩუქრები საზეიმოდ გადასცეს.
ცერემონიალის დასრულების შემდეგ პოლკოვნიკმა როინ ფაილოძემ კურსდამთავრებულებს სიტყვით მიმართა და კურსის მნიშვნელობაზე ისაუბრა. პოლკოვნიკმა როინ ფაილოძემ ქართველ და უკრაინელ სამხედროებს კურსის წარმატებით დასრულება მიულოცა და აღნიშნა, რომ მსგავსი სწავლებები ორ ქვეყანას შორის სამხედრო სფეროში ურთიერთანამშრომლობის კიდევ უფრო გაღრმავების შეუწყობს ხელს.
პოლკოვნიკ ბესიკ ქუთათელაძის სახელობის საჩხერის სამთო მომზადების სკოლაში ნატოს პარტნიორობა მშვიდობისათვის პროგრამის (PFP) ზამთრის საბაზისო კურსი საქართველოსა და უკრაინის რესპუბლიკის თავდაცვის სამინისტროებს შორის ორმხრივი სამხედრო თანამშრომლობის პროგრამის ფარგლებში გაიმართა. სწავლებაში ქართველებთან ერთად უკრაინელი სამხედროები მონაწილეობდნენ. სწავლების ფარგლებში სკოლის ინსტრუქტორებმა მსმენელებს თხილამურებზე სრიალი, ზვავში მოყოლილი ადამიანის ძებნისა და ევაკუაციის ტექნიკურ მეთოდები, ასევე თხილამურებით დაბრკოლებათა ზოლის გადალახვა და თოვლის თავშესაფრის ე.წ. „იგლუს” მოწყობა შეასწავლეს.