„ამერიკული მხარის დახმარებით საქართველოს შეიარაღებული ძალებს უახლესი კავშირგაბმულობის სისტემები გადაეცემა და საქართველოს თავდაცვის მზადყოფნის პროგრამაში მონაწილე ყველა ქვედანაყოფი აღიჭურვება,“ - განაცხადა საქართველოს შეიარაღებული ძალების გენერალური შტაბის უფროსმა, გენერალ-მაიორმა ვლადიმერ ჩაჩიბაიამ კავშირგაბმულობის დღეზე ვაზიანის აეროდრომზე.
დღეს საქართველოს შეიარაღებული ძალები კავშირგაბმულობის 27 წლის იუბილეს აღნიშნავს. სიტყვით გამოსვლისას გენერალ-მაიორმა ვლადიმერ ჩაჩიბაიამ კავშირგაბმულობის სპეციალისტებს თავდაცვის მინისტრის სახელით გულთბილი მილოცვა გადასცა და აღნიშნა, რომ მართვისა და კონტროლის სისტემის განვითარება თავდაცვის უწყების ერთ-ერთი პრიორიტეტია.
ღონისძიების ოფიციალური ნაწილის დასრულების შემდეგ სტუმრებმა აეროდრომზე წარმოდგენილი კავშირგაბმულობის ტექნიკა, მართვის პუნქტები და მათი კავშირგაბმულობის კვანძები დაათვალიერეს.
ღონისძიების ფარგლებში „კავშირი 2018“ საჩვენებელი სწავლება გაიმართა. ტაქტიკურ-სპეციალური კავშირგაბმულობის სწავლების მიზანს კავშირგაბმულობითა და ინფორმაციული სისტემებით მართვის პუნქტების მხარდაჭერა წარმოადგენდა. სწავლება 29 მაისს დაიწყო და დღეს დასრულდა.
კავშირგაბმულობის განყოფილება 1991 წლის დეკემბერში გენერალურ შტაბში შეიქმნა, ხოლო მოგვიანებით, საქართველოს რესპუბლიკის თავდაცვის მინისტრის 1992 წლის 5 ივნისის №100 ბრძანებით კავშირგაბმულობის სამმართველო და გენერალური შტაბის კავშირგაბმულობის კვანძი ჩამოყალიბდა.