„ჩემი ცოლის დაქალების“ სიუჟეტი რეალობად კიდევ ერთხელ გადაიქცა. ამჯერად საქმე იტალიელ მომღერალს ადრიანო ჩელენტანოს ეხება. როგორც აღმოჩნდა 2019 წლის 3 მარტისთვის დაანონსებული კონცერტი, ფილარმონიაში, ადრიანო ჩელენტანოს გარეშე ჩაივლის. თბილისში მის ნაცვლად იტალიელი მსახიობისა და მომღერლის ოფიციალური ორეული ადოლფო სებასტიანო ჩამოდის.

59 წლის ადოლფო სებასტიანოს საკუთარი ბენდი “Adriano Celentano Tribute” ჰყავს და ის ადრიანო ჩელენტანოს იმიჯით კონცერტებს მსოფლიოს სხვადასხვა ქალაქებში მართავს. რეალურმა ადრიანო ჩელენტანომ საკონცერტო მოღვაწეობა უკვე რამდენიმე წელია შეწყვიტა.

Fix Group-ის ფეისბუკგვერდზე თავდაპირველად მითითებული იყო რომ თბილისში ადრიანო ჩელენტანო ჩამოდიოდა, ამ დროისთვის აღნიშნული სტატუსი წაშლილია და მის ნაცვლად გავრცელებულ ინფორმაციაში ნათქვამია, რომ 3 მარტს LUI E GLI AMICI DEL RE & ადრეანო ჩელენტანოს შოუ გაიმართება.

რაც შეეხება ჩცდ-ს სიუჟეტის რეალობად კიდევ ერთხელ გადაქცევას: სერიალის ერთ-ერთი პოპულარული პერსონაჟის შავლეგ მადლიანისა და მისი ძმის გერას შორის მომხდარი კონფლიქტის მიზეზი სწორედ ჩელენტანოს ორეული გახდა. სერიალის სიუჟეტის მიხედვით, შაგუმ გერას შაო-ბებოებისთვის ჩელენტანოს ჩამოსაყვანად ფული მისცა, მან კი ჩელენტანოს ნაცვლად ორეული ჩამოიყვანა, დარჩენილი ფულით კი დასასვენებლად წავიდა: