3 760 500 ლარი სახელმწიფო ბიუჯეტის დავალიანება, რომელსაც გოგა ხაინდრავა არ იხდის - ქართული ოცნების მთავარმა იდეოლოგმა ოცნების ხელისუფლებაში მოსვლის შემდეგ რეჟისორობიდან ბიზნესში გადაინაცვლა. მის კომპანიას - მიწადმოქმედთა ერთობას 2014 წელს პრემიერმა, ირაკლი ღარიბაშვილმა, 34 937 ლარად ნახევარი მილიონი კვადრატული მეტრი მიწა გადასცა. ღარიბაშვილის განკარგულებაში წერია, რომ მიზერულ ფასად მიწის შემდეგ ხაინდრავა ვალდებული იყო, თეთრიწყაროში 350 ათასი ლარის ინვესტიცია განეხორციელებინა, შეეძინა 150 ძროხა, მოეშენებინა ფუტკარი, აშენებინა სათბური და დაესაქმებინა ხალხი. თუმცა, 150-ის ნაცვლად, ადგილზე ჩასულ კურიერის გადამღებ ჯგუფს მხოლოდ ორი ძროხა დახვდა. სად არის ხელშეკრულებით ნაკისრი დანარჩენი 148 მსხვილფეხა პირუტყვი, ამ კითხვამ ხაინდრავა იმდენად გააღიზიანა, რომ დახმარების თხოვნით საპატრულო პოლიციას მიმართა. ძროხების მოშენება ერთადერთი ვალდებულება არ არის, რომელიც ხაინდრავამ სახელმწიფოს წინაშე აიღო და მიუხედავად იმისა, რომ პირობა არ შეასრულა, ჯამში შეთანხმების დარღვევის გამო, ხაინდრავას ბიუჯეტის წინაშე უკვე სამ მილიონზე მეტი დავალიანება აქვს. ფულს არ იხდის და კურიერის ინფორმაციით, ხელისუფლებისგან დავალიანების ჩამოწერას ითხოვს. ეკონომიკის სამინისტრომ გოგა ხაინდრავას დავალიანებაზე სატელევიზიო განმარტებების გაკეთება არ ისურვა, თუმცა, კურიერისთვის გამოგზავნილ წერილში ადასტურებს, რომ ხაინდრავას სახელმწიფო ვალი აქვს სამი მილიონი, არ შეუსრულებია საინვესტიციო ვალდებულები და ქონების მართვის სააგენტოში არ წარუდგენია ინვესტიციის დამადასტურებელი დოკუმენტები. ახლა კი სამი მილიონი ლარის ჩამოწერას ითხოვს და სახელმწიფოსთან დადებული კონტრაქტის გადახედვის მოთხოვნით ეკონომიკის სამინისტროს ორჯერ მიმართა. 2 ძროხა, რამდენიმე სკა და მიწებთან ერთად და მშენებარე სახლები - ასე გამოიყურება ხაინდრავას მიერ დაპატრონებული ტერიტორია თეთრიწყაროში მაშინ, როდესაც მას იქ წალკოტი უნდა გაეშენებინა. გოგა ხაინდრავას კომპანიასა და სამ მილიონიან დავალიანებაზე კითხვას გაექცა ფინანსთა მინისტრიც. ის რუსთავი2-ს დაემალა.
ვაჭრობა ადამიანების რელიგიური გრძნობებით - კურიერს სანდო წყარომ მიაწოდა ფარული ჩანაწერი, სადაც გარდაბნის მერის მოადგილე თავად აღიარებს, რომ ხალხი დაიბარა და ფიცი დაადებინა, რომ არჩევნების მეორე ტურზე ხმას ნამდვილად სალომე ზურაბიშვილს მისცემენ. ფარული მასალების მოპოვების შემდეგ კურიერმა ის ადამიანების ჩაწერა შეძლო, ვინც დაიბარეს და ფიცი პურზე დაადებინეს. პურზე დაფიცება მუსლიმი მრევლისთვის ნიშნავს, რომ ამ ფიცს არასდროს გატეხენ და იძულებულები არიან, დათქმა შეასრულონ. რეპორტაჟზე ქვემო ქართლში კურიერის სპეციალურმა კორესპოდენტმა, ჯეიხუნ ნარზალოვმა, იმუშავა, ამის შემდეგ კი მასზე ზეწოლა დაიწყო. ტელეფონით კურიერის ჟურნალისტს გარდაბნის მერის მოადგილის შვილმა დაურეკა და დაემუქრა, რომ, თუ მასალა ეთერში გავიდოდა, მას გაანადგურებდნენ. სოფელ ნაზარლოს მოსახლეობა ამბობს, რომ ივანიშვილის გუნდი ხმებზე ღამით ნადირობს, ქართული ოცნების წევრები ოჯახებში მიდიან. ზოგს აშინებენ, ზოგს აფიცებენ და სალომე ზურაბიშვილისთვის ხმის მიცემას ამ გზით აიძულებენ. სკანდალური ჩანაწერის მთავარი ფიგურანტი, გარდაბნის მერის მოადგილე, რომელიც ჩანაწერში აღიარებს, რომ ხალხს ზურაბიშვილისთვის ხმის მიცემას აიძულებს და ფიცს ადებინებს, ტელეკამერების გამოჩენამ გააღიზიანა, ის კურიერის კითხვებს გაექცა. ის, რასაც მერის მოადგილე უარყოფს, მისი თანაგუნდელი ადასტურებს. სალომე ზურაბიშვილის შტაბის თანამშრომელი, ელბრუს აბასოვი, ამბობს, რომ ხალხს ფიცი ნამდვილად დაადებინეს, თუმცა, გაოგნებულია იმის გამო, რომ საუბრის ფარულად ჩაწერეს და აუდიოფაილი კურიერს გადასცეს. ავოტირ: ჯეიჰუნ ნარზალოვი
#პოლიტიკა
#პოლიტიკა
#პოლიტიკა