საქართველოს რეგიონული განვითარებისა და ინფრასტრუქტურის მინისტრმა, დავით ნარმანიამ, ქ. რუსთავის მერ დავით ჯიქიასთან და რუსთავის მაჟორიტარ დეპუტატ ზვიად ძიძიგურთან ერთად, დღეს, ცენტრალური ბიუჯეტიდან რუსთავში დაფინანსებული პროექტების მიმდინარეობა დაათვალიერა.
რეგიონული განვითარებისა და ინფრასტრუქტურის სამინისტრომ, რეგიონებში განსახორციელებელი პროექტების ფონდიდან, ქ. რუსთავში ინფრასტრუქტურული პროექტების განსახორციელებლად, წელს, 13 მილიონ 376 ათასი ლარი გამოჰყო.
„პროექტების მიმდინარეობის მონიტორინგისთვის, რუსთავში უკვე მესამედ ჩამოვედი,“ - განაცხადა დავით ნარმანიამ, - „ყველა სამუშაო საკმაოდ ინტენსიურად მიმდინარეობს, ძირითადი ნაწილი სრულდება კიდეც. ძალიან ბევრი კარგი საქმე კეთდება რუსთავში, როგორც შიდა კვარტალური გზების, ისე მრავალსართულიანი სახლების გადახურვის თვალსაზრისით, კეთდება, ასევე, პარკი, რაც ძალიან მნიშვნელოვანია ახალგაზრდებისა და ბავშვებისთვის. ყველაფერი ეს მოგვცემს შესაძლებლობას, მომდევნო წელს სხვა, შედარებით მეორეხარისხოვანი პრობლემები მოვაგვაროთ.“