საქართველოს რეგიონული განვითარებისა და ინფრასტრუქტურის მინისტრის მოადგილე შოთა მურღულიამ გურჯაანისა და ლაგოდეხის მუნიციპალიტეტში მიმდინარე ინფრასტრუქტურული სამუშაოები დაათვალიერა. რეგიონებში განსახორციელებელი პროექტების ფონდიდან წელს გურჯაანის მუნიციპალიტეტს 16 ინფრასტრუქტურული პროექტის დასაფინანსებლად 6 მილიონ ლარამდე გამოეყო; ლაგოდეხში დაფინანსდა 7 მსხვილი ინფრასტრუქტურული პროექტი, საერთო ღირებულებით 3,5 მილიონი ლარი.
„ეს არის სოფლების წყალმომარაგების, გზების რეაბილიტაციის პროექტები და ისინი საკმაოდ წარმატებით მიმდინარეობს,“ - განაცხადა შოთა მურღულიამ, - „ჩვენ გავეცანით თითოეულის მიმდინარეობას, ნაწილი დასრულების სტადიაშია, ნაწილი - ამ წლის ბოლომდე დასრულდება. ამ პროექტებს შორის არის ისეთი მნიშვნელოვანი პროექტები, როგორიცაა გზების მშენებლობა სოფლებში, სადაც გზა ბოლო 30 წელი არ ყოფილა. ეს გზები კეთდება კაპიტალურად, რაც მუნიციპალიტეტების ინფრასტრუქტურულ მდგომარეობას მნიშვნელოვანად გააუმჯობესებს.“
ლაგოდეხის მუნიციპალიტეტს შარშან რეგიონებში განსახორციელებელი პროექტების ფონდიდან 1 მილიონი ლარი გამოეყო და აქედან ძირითადი თანხა სტიქიის შედეგების ლიკვიდაციისთვის იყო გათვალისწინებული. წელს ინფრასტრუქტურის მოსაწესრიგებლად განსაზღვრული 3,5 მილიონიდან მარტო ამ მუნიციპალიტეტში 10 კმ-მდე გზა დაიგება და წყლის პრობლემა რამდენიმე სოფელს მოუგვარდება.