ექნება თუ არა მთიან რეგიონებს შეღავათები, როგორი იქნება მათი სტატუსი და განვითარების პერსპექტივები, - ამ საკითხებზე იმსჯელეს ექსპერტებთან ერთად საქართველოს რეგიონული განვითარებისა და ინფრასტრუქტურის სამინისტროში. სამინისტროს წარმომადგენლებმა ექსპერტთა ჯგუფთან თვითმმართველობის კოდექსი განიხილეს და მთის შესახებ მომავალი კანონის დეტალებზე ისაუბრეს. როგორც სამინისტროში განმარტავენ, მთის კანონი თვითმმართველობის რეფორმის განხორციელების ერთ-ერთი მნიშვნელოვანი კომპონენტი იქნება, ვინაიდან ის არა მარტო საქართველოს სოციალურ-ეკონომიკური განვითარებისთვის, არამედ ქვეყნის უსაფრთხოების თვალსაზრისითაც მეტად მნიშვნელოვანია.
ექსპერტთა ჯგუფის განცხადებით, მთის კანონი თვითმმართველობის კოდექსის ლოგიკური გაგრძელება იქნება და მოსახლეობა ადგილებზე ამ ცვლილებებს მაღალი მოტივაციით ელოდება.