საკრებულოს წევრ ქალთა ფორუმის სამუშაო ჯგუფს საქართველოს რეგიონული განვითარებისა და ინფრასტრუქტურის მინისტრმა, დავით ნარმანიამ სასტუმრო „თბილისი მარიოტში" თვითმმართველობის რეფორმის ძირითადი სიახლეები გააცნო.
მინისტრმა ისაუბრა რეფორმით დაგეგმილ მთავარ მიმართულებებზე - თვითმმართველი ქალაქების რაოდენობის ზრდაზე, სამხარეო საბჭოების მნიშვნელობაზე, გუბერნატორების სტატუსზე, თვითმმართველობების გაზრდილ უფლებებზე, დაფინანსების წყაროებსა და გათანაბრების პრინციპზე, რაც დეცენტრალიზაციის უმთავრესი პრინციპებია.
„ეს რეფორმა მიმართულია იმისკენ, რომ თვითმმართველობები გაძლიერდნენ," - განაცხადა დავით ნარმანიამ, - „უკვე იმ ეტაპზე ვართ, რაც მეტი ხალხი იქნება ჩართული პროცესში, მით უკეთესი. მიუხედავად იმისა, რომ ცვლილებებს დაფინანსებაში თვითმმართველობები 2015 წლის 1 იანვრიდან იგრძნობენ, 2014 წლის ადგილობრივი არჩევნების შედეგად, ჩვენ უკვე პრინციპულად სხვა თვითმმართველობებს მივიღებთ, არჩევითი მერებითა და გამგებლებით."
შეხვედრა ჩატარდა პროექტის - „ქალებს შეუძლიათ მართონ ქვეყანა" - ფარგლებში, რომელსაც ახორციელებს საქართველოს მუნიციპალური მომსახურების უზრუნველმყოფთა ასოციაცია, გაეროს ერთობლივი პროგრამის - „გენდერული თანასწორობის ხელშეწყობისთვის საქართველოში" მხარდაჭერით.
„ჩვენი ორგანიზაციის მუშა ჯგუფმა რეგიონებში ჩაატარა მოკვლევა და დღეს დაისვა ყველა კითხვა, რომელიც ამ მოკვლევის შედეგად გაჩნდა," - განაცხადა საქართველოს მუნიციპალური მომსახურების უზრუნველმყოფთა ასოციაციის აღმასრულებელმა დირექტორმა, ქეთი ჯაყელმა, - „მიღებულ პასუხებს ადგილებზე მივიტანთ. ეს ერთგვარი უკუკავშირი იქნება. მთლიანობაში კი, მოხდება ქალბატონების მხრიდან არსებული პრობლემების ადვოკატირება."
თვითმმართველობის რეფორმა განხორციელდება თვითმმართველობის ახალი კოდექსის მიხედვით, რომელიც საქართველოს მთავრობამ 30 ოქტომბრის სხდომაზე დაამტკიცა. დოკუმენტი საქართველოს პარლამენტს განსახილველად უკვე გადაეგზავნა.