წყარო: http://1tv.ge/news-view/60178
92 წლის ასაკში, საკუთარ სახლში ქართველი კლასიკოსი ჭაბუა ამირეჯიბი გარდაიცვალა. მისი მრავალმხრივი შემოქმედებიდან განსაკუთრებით ცნობილია რომანი "დათა თუთაშხია", რომელიც მეოცე საუკუნის ქართული მწერლობის ერთ-ერთ აღიარებულ ნაწარმოებად არის მიჩნეული.
მას ასევე ეკუთვნის რამდენიმე რომანი, მოთხრობები, კრიტიკულ-პუბლიცისტური წერილები, სცენარები, სტატიები. 2010 წლის 15 ოქტომბერს ჭაბუა ამირეჯიბი ბერად აღიკვეცა და სახელად დავითი ეწოდა.
ქართველი კლასიკოსის გარდაცვალების გამო მწუხარებას გამოთქვამს საქართველოს პრემიერ-მინისტრი. ირაკლი ღარიბაშვილის სამძიმრის წერილში ნათქვამია, რომ ჭაბუა ამირეჯიბის შემოქმედება არა მხოლოდ ქართული, არამედ მსოფლიო ლიტერატურის საგანძურად იქცა.
ირაკლი ღარიბაშვილმა დღესვე სპეციალური განკარგულებბა გამოსცა. განკარგულების მიხედვით, მთავრობა ამირეჯიბის ოჯახს მატერიალურ დახმარებას გაუწევვს. ასევე, სახელმწიფო მთლიანად უზრუნველყოფს ქართველი მწერლის დაკრძალვის ხარჯებსაც. მანანა ბერიკაშვილის განცხადებით კი, ჭაბუა ამირეჯიბს დიდუბის პანთეონში დაკრძალავენ.