ვიდეომ, რომელშიც ახალშობილი დათვის ბელი თავისი პირველი ნაბიჯების გადადგმას დიდი მონდომებით ცდილობს, ინტერნეტსივრცეში პოპულარობა მოიპოვა და უცხოური წამყვანი მედიასაშუალებების ყურადღების ცენტრშიც მოექცა.
ტორონტოს ზოოპარკის ადმინისტრაციის მიერ 6 დღის წინ (8 იანვარს) გამოქვეყნებული ვიდეოს ნახვების რაოდენობა 4.8 მილიონს აჭარბებს.
გამოცემა ,,ჰაფინგტონ პოსტის" ინფორმაციით, ზოოპარკის მკვიდრმა ძუ დათვმა ,,ავრორამ” 2013 წლის 9 ნოემბერს სამი ნაშიერი დაბადა. სამწუხაროდ, შემდგომი 48 საათის განმავლობაში ორი მათგანი დაიღუპა. სისუსტის ნიშნები ეტყობოდა მესამე ბელსაც, თუმცა ტორონტოს ზოოპარკის პერსონალის მზრუნველობით გამოჯანმრთელდა და, როგორც ზოოპარკში აცხადებენ, ,,საკამოდ აქტიურია".
,,ჩვენი გუნდი აგრძელებს ამ ბელზე მზრუნველობას და ძალიან გვიხარია მისი პროგრესი. ვიმედოვნებთ, რომ მისი სახით, პოლარული დათვის სახეობის კიდევ ერთი თვალსაჩინო წარმომადგენელი გაიზრდება" – განაცხადა ზოოპარკის უფროსმა ვეტერინარმა გრეჰემ კროშომ.
პოლარული დათვი ბუნების დაცვის საერთაშორისო კავშირის (IUCN) მიერ დაუცველ სახეობადაა აღიარებული. ბუნების დამცველთა განცხადებით, კლიმატის ცვალებადობამ უახლოეს რამდენიმე ათწლეულში, შესაძლოა, მკვეთრად შეამციროს ველურ ბუნებაში არსებული პოლარული დათვების რაოდენობა. IUCN–ის შეფასებით, 2050 წლისათვის ამ სახეობის ინდივიდების რაოდენობა 30%–ზე მეტით შემცირდება. ბუნების დაცვის მსოფლიო ფონდი ამ პრობლემის ხელშემწყობ ფაქტორებად უკონტროლო ნადირობასა და არქტიკაზე მიმდინარე ნავთობისა და გაზის მომპოვებელ პროცესებს მიიჩნევს