ერთ-ერთი საკითხი, რაზეც დღეს მთავრობის წევრებმა იმსჯელეს, მიუსაფართა თავშესაფრის მოწყობისთვის ახალი რეგულაციების ამოქმედება იყო. კაპიტალური ტიპის დასახლების მშენებლობა დიდი ლილოს ტერიტორიაზე სწორედ ამ რეგულაციების დამტკიცების შედეგად მოხდება.
დავით ნარმანია : დავამტკიცეთ წესი, რომელიც ჯანდაცვის სამინისტრომ საერთაშორისო პრაქტიკაზე დაყრდნობით შეიმუშავა. ეს არის ძალიან კარგი რეგულაცია იმისათვის, თუ როგორ უნდა მოეწყოს მიუსაფართა თავშესაფარი. თუ ჩვენ აქამდე ჩვენი სახელმწიფო კომისიის ფარგლებში მიღებული დროებითი გადაწყვეტილებებით ვსარგებლობდით, ახლა უკვე ამ წესის შესაბამისად იქნება შესაძლებელი ვიმუშაოთ. ეს წესი ითვალისწინებს იმას, თუ რა ფართი უნდა ქონდეს დაკავებული მიუსაფარს, როგორ უნდა იყოს დაშორება მიუსაფართა თავშესაფარსა და უახლოეს დასახლებულ პუნქტს შორის.