5 დაღუპული და 8 ინფიცირებული - ასეთია ბოლო მონაცემები სამტრედიის სათნოების სახლიდან. ხანდაზმულთა გარდაცვალების ოფიციალური მიზეზი ჯერ უცნობია. ვრცელდება მხოლოდ წინასწარი ვერსია, რომლის მიხედვით ლეტალური შედეგი, ვირუსულმა გრიპმა გამოიწვია. 5 ბენეფიციარი, ბოლო 48 საათში გარდაიცვალა და ყველა მათგანს ერთი და იგივე სიმპტომი - მაღალი ტემპერატურა აღენიშნებოდა. ანალოგიური ნიშნით, სათნოების სახლიდან ქუთაისის ინტერვენციული მედიცინის ცენტრში, კიდევ 8 ადამიანია გადაყვანილი. ფაქტზე უკვე დაწყებულია გამოძიება. გარდაცვალების ზუსტ მიზეზებს, ლაბორატორიული კვლევა დაადგენს, რომლის პასუხი უახლოეს დღეებში გახდება ცნობილი.