დღეს საქართველოს რეგიონული განვითარებისა და ინფრასტრუქტურის სამინისტროში მინისტრმა, დავით ნარმანიამ სამშენებლო კომპანია „ალტ-კომის“ წარმომადგენლებთან შეხვედრა გამართა. კომპანია „ალტ-კომმა“ გაიმარჯვა სამინისტროს მიერ გამოცხადებულ ტენდერში, რომელიც 2014 წელს ჩქაროსნული ავტომაგისტრალის სამტრედია-გრიგოლეთის გზის მონაკვეთის სამშენებლო სამუშაოების შესრულებას გულისხმობს.
შეხვედრაზე საუბარი შეეხო სამშენებლო სამუშაოების დაწყებისა და დასრულების ვადებს. მინისტრი, ასევე, დაინტერესდა კომპანიის თანამშრომლების კვალიფიკაციითა და მათ მიერ განხორციელებული სხვა პროექტებით. როგორც „ალტ-კომის“ წარმომადგენლებმა აღნიშნეს, ისინი მჭიდროდ თანამშრომლობენ გერმანელ კოლეგებთან და აქტიურად იზიარებენ ამ სფეროში მათ გამოცდილებას. საუბარი შეეხო იმ ტექნიკის ხარისხსაც, რომელსაც ტენდერში გამარჯვებული კომპანია სამტრედია-გრიგოლეთის გზის მონაკვეთის მშენებლობის დროს გამოიყენებს.
უკრაინული სამშენებლო კომპანია „ალტ-კომი“ საქართველოში პროექტს პირველად განახორციელებს. გასულ წლებში იგი სამშენებლო სამუშაოებს აწარმოებდა მსოფლიოს სხვადასხვა ქვეყნებში, მათ შორის, ამერიკის შეერთებულ შტატებშიც.
სამტრედია-გრიგოლეთის საავტომობილო გზის I ლოტის მშენებლობას „ალტ-კომი“ მარტის თვეში დაიწყებს.