საქართველოს რეგიონული განვითარებისა და ინფრასტრუქტურის მინისტრი დავით ნარმანია, მინისტრის მოადგილე გიორგი ამაშუკელთან და მუნიციპალური განვითარების ფონდის აღმასრულებელ დირექტორთან, ელგუჯა ხოკრიშვილთან ერთად, გერმანიაში ვიზიტს აგრძელებს.
ვიზიტის ფარგლებში მინისტრმა შეხვედრები გამართა „Dautsche Bank"-ის, "Boston Consulting Group"-ის, "ING Group"-ის, „Global Solar"-ისა და „KSP"-ს წარმომადგენლებთან, რომლებთანაც სამომავლო თანამშრომლობის საკითხები განიხილა.
ქართულმა დელეგაციამ, ასევე, შეხვედრა გამართა ქალაქ მანჰეიმის მერთან, დოქტორ კურცისთან, რომელთანაც დიდი ქალაქების ადმინისტრაციული სტრუქტურის, ადგილობრივი ინფრასტრუქტურის - გზებისა და ხიდების რეაბილიტაციის საკითხები და ამ მხრივ არსებული გერმანული გამოცდილება განიხილა.
დღის ბოლოს დარმშტადტის უნივერსიტეტში მინისტრმა ხელი მოაწერა მემორანდუმს, რომლის ფარგლებშიც უნივერსიტეტი დაეხმარება საქართველოს საგზაო ინფრასტრუქტურაში ევროპული სტანდარტების შემუშავებაში. მან ასევე დაათვალიერა უნივერსიტეტში არსებული საგზაო და წყლის ინფრასტრუქტურის ლაბორატორიები და იმედი გამოთქვა, რომ სულ მალე ანალოგიური ლაბორატორიები საქართველოში ტექნიკური უნივერსიტეტის ბაზაზეც შეიქმნება.
დავით ნარმანიას ვიზიტი გერმანიაში 22 მარტს დასრულდება.